Франкфуртад үлдээсэн иргэн ЭСЯ-ны тавьсан саналуудаас татгалзсан

Улсын Онцгой комиссын шийдвэрээр энэ сард Франкфурт руу хоёр удаагийн тусгай үүргийн нислэг үйлдсэн. Тодруулбал, энэ сарын 17-нд Франкфуртаас эх орондоо ирэхээр бүртгүүлээд байсан иргэн Ц.Цэцэгбалыг Covid-19 халдвартай гэх шалтгаанаар онгоцонд суулгалгүй үлдээсэн гэх мэдээлэл хэвлэлүүдээр гарах болсон. Тэгвэл Монгол Улсаас Холбооны Бүгд Найрамдах Герман Улсад /ХБНГУ/ суугаа Элчин сайдын яамнаас өчигдөр /2020.12.19/ дараах мэдэгдлийг гаргажээ.

Тус мэдэгдэлд дурдсанаар “Арванхоёрдугаар сарын 16, 17-ны өдөр Франкфурт-Улаанбаатар чиглэлийн хоёр удаагийн тусгай үүргийн нислэгээр Европын Холбоо, ИБУИНВУ, АНУ, Канад, БНТУ-аас нийт 320 иргэнийг нутаг буцаах арга хэмжээг зохион байгууллаа. Энэ удаагийн нислэгүүд 160 хүний багтаамжтай бага оврын онгоцоор үйлдэгдсэн. Арванхоёрдугаар сарын 16-ны өдрийн нислэгт Прага дахь ЭСЯ-наас бүртгэгдэж нутаг буцахаар Франкфуртын олон улсын нисэх онгоцны буудалд ирсэн иргэн Ц.Ц зорчигчдыг бүртгэх явцад Covid-19 шинжилгээ эерэг гарсныг мэдэгдэлгүйгээр бусад иргэдийн хамт бүртгэлд хамрагдаж, явах танхимд орсон байсан.

Тэнд хамт нисэхээр хүлээж байсан зарим зорчигч “шинжилгээний хариу эерэг гарсан хүн энд байна” гэж мэдэгдсэнээр иргэдийн шинжилгээний мэдүүлгийг дахин шалгах шаардлага үүссэн.

Энэ үед иргэн Ц.Ц шинжилгээний хариугаа үзүүлсэн. Өндөржүүлсэн бэлэн байдлын үед мөрдөх журмын дагуу халдвартай хүмүүсийг тээвэрлэхийг хориглосон тул иргэн Ц.Ц-ийн байдлын талаар Улсын Онцгой комисст мэдээлсэн. Комиссоос бусад зорчигчдын эрүүл мэнд, аюулгүй байдлыг хамгаалах үүднээс онгоцонд суулгахгүй байх чиглэл ирүүлснийг тус иргэнд мэдэгдсэн. Улмаар, эл байдалд хэрхэх талаар тайлбарлан, өөрийнх нь зөвшөөрсний дагуу Хил хамгаалах байгууллагатай уулзуулж хэлмэрчлэн, шаардлагатай тусламж үзүүлсэн.

Иргэн Ц.Ц-г Ажлын хэсэгтэй холбоо барих утасны дугаар, бусад мэдээллээр хангасан. Элчин сайдын яамны ажилтнууд онгоц хөөрөх хүртэл нисэх буудалд ажилласан бөгөөд тухайн иргэн эргэж холбоо бариагүй. Маргааш нь буюу арванхоёрдугаар сарын 17-ны өдрийн онгоцны бүртгэлд иргэн Ц.Ц ирж, хүсэлт тавьсны дагуу Улсын Онцгой комисст дахин хандсан. Гэвч мөрдөгдөж байгаа журмын дагуу тус иргэнийг үлдээхээс өөр аргагүй болсон.

Ингээд ЭСЯ-ны ажилтнууд дараах боломжуудыг түүнд санал болгосон.

1. Монгол Улсаас БНЧУ-д суугаа ЭСЯ-аас тусгаарлах байр бэлдсэн учир Чех буцах арга хэмжээ хамтран зохион байгуулах,
2. Берлин хотод байрлаж тусгаарлалтад орох,
3. Франкфурт хотын Эрүүл мэндийн албанаас заасан байранд тусгаарлагдах.

Иргэн Ц.Ц энэ гурван саналаас бүгдээс нь татгалзсан. Түүнчлэн, тийзийн мөнгөө буцааж авах хүсэлт гаргахад МИАТ ТӨХК тийзийн төлбөрийг зөвхөн дансаар буцаадаг, харин иргэн Ц.Ц гадаадад ашиглах данс байхгүй гэж мэдэгдсэн. Үүнийг шийдэх үүднээс ЭСЯ болон МИАТ-ын нийт найман ажилтан хувиасаа 802.79 евро цуглуулж гардуулахад мөн татгалзсан.

Бусад улсаас ирж буй монгол иргэдийг онгоцонд бүртгэхээр ажлын хэсгийнхэн транзит хэсэг руу дотогш орсон бөгөөд онгоц хөөрсний дараа иргэн Ц.Ц-тэй эргэж уулзахаар иртэл тэрбээр танилцсан монгол иргэний гэрт очсон мэдээлэл авсан.

Арванхоёрдугаар сарын 18-ны өдөр түүнийг олж холбоо барихад тэрээр Франкфурт хотноо монгол оюутны байранд тусгаарлагдсан байгаагаа нотолсон. Ажлын хэсэг тэр өдрөө Берлинд буцаж ирсэн бөгөөд ГХЯ-нд танилцуулж, ирүүлж буй чиглэлийн дагуу шаардлагатай тусламжид хамруулах талаар ажиллаж байна. Эрүүл мэндийн байдал нь хэвийн байна.

Үүнээс гадна Шведээс Франкфуртын ОУНОБ-д хүрэлцэн ирсэн иргэн Х.М нь Герман улсын хил зөрчсөн шалтгаанаар ХБНГУ-ын Хил хамгаалах байгууллагад саатуулагдсан. Тус өдрийн нислэгт түүний нэр нь батлагдаагүй байсан. Стокгольм дахь ЭСЯ-тай холбогдож түүнийг арванхоёрдугаар сарын 14-ны өдөр Covid-19 шинжилгээ өгөхөд хариу нь эерэг гарсныг тогтоосон. Иргэн Х.М-ий нутаг буцах хүсэлтийг УОК-т хүргүүлж, боломжгүй тухай хариуг өөрт нь уламжилсан. Иргэн Х.М-д суугаа оронд үйлчилж байгаа цар тахалтай холбоотой дүрэм журмыг танилцуулж, өөрийнх нь зөвшөөрснөөр ХБНГУ-ын Хил хамгаалах байгууллагатай уулзахад хэлмэрчлэн, Франкфурт хотын Эрүүл мэндийн албанаас тогтоох тусгаарлалтад орохыг иргэн Х.М-д тайлбарлав. Визний зөрчилтэй байсан тул тухайн иргэнийг авч явахыг бидэнд зөвшөөрөөгүй болно. Иргэн Х.М-ийн байрлаж буй буудлаар нь дамжуулан холбоотой байгаа бөгөөд эрүүл мэндийн байдал нь хэвийн байна. Байрлаж буй зочид буудлаас иргэн Х.М-тэй холбоотой зардлын нэхэмжлэлийг ЭСЯ хүлээн авч, Монголын холбогдох байгууллагад хүргүүлсэн бөгөөд хоол ундны зардлыг шийдэхээр ажиллаж байна. Иргэн Ц.Ц-г тусгаарлалтын зориулалттай байранд оруулахаар судлан ажиллаж байгаа болно.

Эдгээр хоёр иргэний байдлын талаар журмын дагуу ГХЯ-ны Консулын газар, УОК-д цаг алдалгүй мэдээлэл хүргүүлж ирсэн болно. Цаашид авах арга хэмжээний талаар ГХЯ, УОК-д танилцуулснаар шуурхай шийдэхээр ажиллаж байна. Ажил үүргийнхээ хүрээнд гадаад улсаас ХБНГУ-аар дамжин өнгөрөх өөрийн иргэдийг хилээр саадгүй нэвтрүүлэх, УОК-ын зааварчилгааны дагуу иргэдийг бүртгэх, мэдээлэл түгээх зэрэг ажлын явцад аюулгүй байдлыг ханган ажилласан. Бусад улс орноос ирсэн иргэдэд тулгамдсан асуудал тус бүрийг шуурхай шийдэх арга хэмжээ авсан.

Үүнд:
1. Визийн зөрчилтэй болон бусад асуудал тулгарсан нийт 21 иргэнд консулын үйлчилгээ үзүүлж, ХБНГУ-ын хилээр саадгүй нэвтрэхэд нь тусалсан. ХБНГУ-ын Хил хамгаалах байгууллагын Франкфурт дахь салбарын удирдлагатай холбогдож, Шенгений визгүй иргэдийг ОУНОБ-ын транзит хэсгээр саадгүй дамжин өнгөрөөх арга хэмжээ авсан. Арванхоёрдугаар сарын 16-ны нислэгт нэр нь батлагдсан иргэн Б.Ө-ын нэр тухайн өдрийн нислэгийн жагсаалтаас хасагдсан асуудал гарсныг шийдвэрлэсэн. Улсын онцгой комисс болон Лондон дахь ЭСЯ-тай холбогдож, шалтгааныг тогтоон манай ЭСЯ-ны зардлаар зочид буудалд байрлуулан. Арванхоёрдугаар сарын 17-ны өдрийн нислэгт шилжүүлэн нутаг буцаав” гэжээ.