УИХ-ын чуулганы үдээш хойшхи хуралдаан үргэлжилж байна.

Хэлэлцэж буй асуудалтай холбогдуулан гишүүд асуулт асууж, хариулт авав.

УИХ-ын гишүүн Ц.Даваасүрэн “Улс төрийн албан тушаалтантай холбоотой том хэргийг илрүүлж чадахгүй байна. С.Зориг, Г.Батхүү агсны хэрэгт ямар ч эзэн байхгүй. Ийм асуудлыг Америкт библийг нь уншуулдаг гэдэг шиг дуудаж ирүүлээд тангараг өргүүлэн сонсдог байх хэрэгтэй. Хэрвээ цэгцлэхгүй бол улс төрийн захиалгат гэмт хэргүүд олширно.

Тиймээс хуульд байсан мөрдөн шалгах гэдэг заалт хэр суларсан бэ? УИХ-аас Засгийн газрын гишүүнд хариуцлага тооцож байгааг сайд нар айгаад ажиллаж чадахгүй байна гэсээр болиулсан. Гэтэл сүүлийн хоёр Засгийн газар гялалзсан уу? Өмнөх Засгийн газруудаас өөрөөр ажиллаж чадсан уу? Төрийн эрх барих дээд байгууллагын төлөөлөл ажилдаа эзэн болж чадахгүй байна. Тодорхой зүйлээр асуувал бичгээр хариулъя гээд гараад явчих юм. УИХ-ын нэр хүнд шалдаа буусан. УИХ-ын онцгой бүрэн эрхийн хүрээнд хяналтаа гүйцэд тавьдаг болмоор байна” гэлээ.

УИХ-ын гишүүн Ж.Сүхбаатар “Мөрдөн гэдгийг тусгай шалгалт гэдэг агуулга руу нь оруулсан. Таны хэлдэг үнэн. Гэхдээ агуулга нь бол өөрчлөгдөөгүй. Цөөнх олонхын хувьд зохицуулалт өөрчлөгдсөн. Бусад улсад байдаг парламентын мөрдөн шалгалтын арга хэрэгсэл манай оронд байдаггүй. Одоо л нэг хяналт шалгалтын механизмтай болж байна. Илэрдэггүй хэргүүдийг олон улсад парламентын мөрдөн шалгалтын хүрээнд илрүүлдэг.

Хууль тогтоомжийг хэрхэн биелэгдэж байгааг хянадаг ерөнхий хяналтын сонсгол явуулахаар болж байгаа” гэв.