МҮЭХ-ноос иргэдийн амьжиргаа, нийгмийн хамгааллыг сайжруулах, төгрөгийн худалдан авах чадварыг дээшлүүлэх, өргөн хэрэглээний бараа бүтээгдэхүүн, ажил үйлчилгээний үнийг тогтвортой байлгахыг УИХ, Засгийн газраас шаардлаа.

Энэ талаар МҮЭХ-ны Ерөнхийлөгч Х.Амгаланбаатар мэдээлэл хийв. Тэрбээр, “Өнөөгийн улс төрийн тогтворгүй нөхцөл байдлын улмаас Хөдөлмөр, нийгмийн зөвшлийн гурван талт 2017-2018 оны улсын хэлэлцээрт тусгасан иргэдийн хөдөлмөр, нийгмийн хамгааллын түвшинг бууруулахгүй байх, цалин хөлсийг нэмэгдүүлэх зэрэг заалтын хэрэгжилт удааширч байна. Мөн төр, засгийн газрын үйл ажиллагааны тогтвортой, хариуцлагатай, ажил хэрэгч шинж чанар алдагдаж хямралын түвшинд хүрлээ. Тиймээс нам, улс төрийн талцлаа зогсоож, Засгийн газар мөрийн хөтөлбөрөө хэрэгжүүлж, иргэдийн амьжиргаа, нийгмийн хамгааллыг сайжруулах, өвөлжилтийн бэлтгэл хангах зэрэг олон тулгамдсан асуудлаа шийдвэрлэхийг шаардаж байна” гэлээ.