Ерөнхий сайд Н.Учрал: Татварын өртэйн улмаас хаагдсан 12.100 компанийн дансыг өнөөдрөөс шууд нээнэ

Ерөнхий сайд Н.Учралын ахалсан Засгийн газрын анхны хуралдаан өнөөдөр 08.00 цагаас эхэлж, дэлхийн нөхцөл байдал хурцдаж байгаа тул яаралтай арга хэмжээ авч ажиллах эхлэлээ тавив.

Тодруулбал, татварын өртэйн улмаас хаагдсан 12.100 компанийн дансыг өнөөдрөөс шууд нээлээ. Энэхүү түгжээг тайлснаар эдийн засгийн цусны эргэлтийг идэвхжүүлэх дохио өгч байна. Татварын ерөнхий хуулиар улс орон, эдийн засагт онцгой нөхцөл байдал үүссэн бол ийм арга хэмжээ авах боломжтой юм. Түгжигдсэн дансанд орлого орж ирэх нь нээлттэй ч зарлага гаргаж болдоггүй. Зарлага гаргаж байж, орлого олж, компани, бизнесийн үйл ажиллагаа хэвийн болж, татвар, зээл, цалин, бусдад өгөх төлбөрөө төлөх нь энгийн ойлголт юм.

Н.Учрал УИХ-ын дарга байхдаа гаргасан “Чөлөөлье” санаачилгынхаа дагуу иргэн, хувийн хэвшилдээ итгэж, 12100 дансны түгжээг тайлж байгаа нь тодорхой байна. Шинэ Ерөнхий сайд Н.Учрал шууд хувийн хэвшилд хаяглаж итгэсэн шийдвэрээрээ зах зээлд эерэг дохио өгч, түлш шатахууны үнийн өсөлтөөс үүдэлтэй хүндрэлийг сөрж, эдийн засгаа идэвхжүүлэх зорилго агуулжээ. Тэрбээр УИХ-ын дарга байхдаа хийж бүтээх хүслийг хяссан хүнд суртлын чөдөр тушаанаас чөлөөлөх бодлогоо зарлаж батлуулсан юм.