Ирэх онд Монголд олон улсын спортын 14, соёлын 20, аялал жуулчлалын 17 арга хэмжээ зохион байгуулна

Монгол Улсад 2023 онд зохион байгуулах олон улсын арга хэмжээний календарийг Засгийн газрын хуралдаанаар баталжээ.

Тус календарьд:

-соёлын 20,
-аялал жуулчлалын 17,
-спортын 14, олон улсын шинж чанартай 20 гаруй арга хэмжээг тусгасан байна.

Мөн онцлох 20 арга хэмжээг Засгийн газрын түвшинд санхүүжилт болон зохион байгуулалтын дэмжлэг үзүүлж, цар хүрээг өргөжүүлж, ач холбогдлыг нэмэгдүүлснээр Монгол Улсыг гадаадад сурталчлан таниулах зорилтыг амжилттай хэрэгжүүлэхэд хувь нэмэр оруулна гэж үзжээ.

Хуралдаанаар уг календарийг олон улсад зарлаж, сурталчлах арга хэмжээ авахыг Гадаад харилцааны сайд Б.Батцэцэг, Соёлын сайд Ч.Номин нарт, календарьд тусгасан арга хэмжээний хэрэгжилтийг хангаж, Аялал жуулчлалыг хөгжүүлэх Үндэсний хороонд тухай бүр танилцуулж байхыг үүрэг болгосон хэмээн Засгийн газрын Хэвлэл мэдээлэлтэй харилцах газраас мэдээлэв.