“Монгол Майкл Фелпс” гэх Баянгол дүүргийн тамирчин, ОБЕГ-ын аврагч Ш.Даваадорж өвлийн усанд сэлэлтийн дэлхийн цомын тэмцээнээс дөрвөн медаль хүртсэн байна. Тэрээр өвлийн болон мөстэй усанд сэлэлтээр хичээллэдэг Монголын цорын ганц тамирчин юм. Түүний хувьд 2018-2019 онд ахмадын ДАШТ, дэлхийн цом, олон улсын тэмцээнээс 32 алт, 29 мөнгө, 14 хүрэл медаль хүртсэн амжилтаар дэлхийн чансааг тэргүүлж, цом эзэмшиж байсан бол өдгөө түүний амжилт ийнхүү нэмэгдсээр байна.

Шведэд зохион байгуулж буй Өвлийн усанд сэлэлтийн дэлхийн цомын аварга шалгаруулах тэмцээнээс Ш. Даваадорж хоёр мөнгө, хоёр хүрэл медаль хүртжээ. Ингэснээр мөстэй усанд сэлэлтийн дэлхийн аваргаас нэг мөнгө нэг хүрэл, өвлийнхөөс хоёр мөнгө, хоёр хүрэл медаль хүртээд байна.

Усанд сэлэлтээр 38 жил хичээллэж буй тэрбээр 45 наснаасаа эхэлж мөстэй усанд сэлэлтийн төрлөөр хичээллэж эхэлсэн аж. Усанд сэлэлтийн спорт ердийн, мөстэй усанд сэлэлт, өвлийн усанд сэлэлт гэсэн гурван төрөл байдаг. Ердийн усанд сэлэлт нь бассейн дотор нэмэх 28 градуст уралддаг.

Швед улсад болсон энэ удаагийн тэмцээн бол Скандиновын улс орнуудын өвлийн усанд сэлэлтийн дэлхийн цомын аварга шалгаруулах тэмцээн бөгөөд нийт 25-100 метрийн зайд тамирчид уралджээ.