Хүүхдийн баярын ууттай бэлгээ сайтар шалгахыг анхааруулж байна

Нийслэлийн Мэргэжлийн Хяналтын Газраас хүүхдийн баяраар урьдчилан сэргийлэх хяналт шалгалтын талаар мэдээлэл, зөвлөмж гаргалаа. Энэ талаар өнөөдөр тус газраас мэдээлэл хийсэн юм.

Шалгалтанд есөн дүүргийн худалдааны чиглэлээр үйл ажиллагаа явуулж буй 26 иргэн, 115 аж ахуй нэгжид хяналт шалгалт хийсэн байна. Нийт 211 зөрчил илрүүлснээс 104 зөрчлийг газар дээр нь арилгуулж улсын байцаагчийн 30 заалт бүхий 4 албан шаардлага хүргүүлэн ажиллажээ. Хяналт шалгалтын явцад шаардлага хангахгүй нөхцөлд хадгалж худалдаалсан болон хугацаа нь хэтэрсэн 74 нэр төрлийн, 448 ширхэг, 1.565.710 төгрөгийн бүтээгдэхүүнийг хураан авч устгуулах арга хэмжээ авчээ. Үүнээс 69 нэр төрлийн бүтээгдэхүүний хугацаа нь хэтэрсэн байсан бөгөөд Үүнд: /Ундаа, жүүс, сок, гаа, бохь, шоколад, набор, кесел, чокопай, резинэн чихэр, модтой чихэр, тоглоомтой чихэр/ багтжээ.

Гэхдээ өмнөх оныхтой харьцуулахад зөрчил дутагдал харьцануй багассан нь аж ахуйн нэгж байгууллага, иргэдийн хүнсний бүтээгдэхүүнийг хэрхэн хадгалах, сонгож авах талын мэдлэг нэмэгдсэнтэй холбоотой байна гэж НМХГ-аас үзэж байгаа юм.

Нийслэлийн Мэргэжлийн Хяналтын Газраас дараах анхааруулгыг хүргэж байна. Тэр тумсаа “Эх үрсийн баяр”-аар хүүхдүүддээ бэлэг сонгохдоо дараах зүйлийг анхаарах хэрэгтэй гэв.

• -Боосон бэлэг дотор байгаа хүнсний бүтээгдэхүүний үйлдвэрлэсэн болон хадгалах хугацааг нэг бүрчлэн үзэж шалгах
• -Хаана үйлдвэрлэсэн нь мэдэгдэхгүй, хаяг шошгыг унших боломжгүй, эргэлзээтэй бүтээгдэхүүн сонгохгүй байх
• -Хэт их чихэрлэг бүтээгдэхүүн сонгохгүй байх. Дундаж хэмжээтэй ундаа жүүсэнд гэхэд ойролцоогоор 50-80 гр сахар агууллагддаг бөгөөд энэ нь таны хүүхдэд шүд өвдөх, харшил үүсгэх богино хугацааны нөлөөтэйгөөс гадна цаашлаад зүрх судас, бөөрний өвчлөлд нөлөөлөх сөрөг үр дагавартай
• -Амархан муудах, хадгалалтын нарийн горим шаарддаг бүтээгдэхүүн боосон бэлгийг худалдан авахгүй байх. Жишээ нь: бүржмэл чихэр, кремтэй нарийн боовны төрлийн бүтээгдэхүүнүүд
• -Хямдрал нэрийн дор худалдан борлуулж буй хүнсний бүтээгдэхүүний хугацааг сайтар харж авах
• -Бялуу хиам зайдсан бүтээгдэхүүн, өндөг гэх мэт түргэн муудах хүнсний бүтээгдэхүүнийг хөргөгчний хэмд хадгалж, тэр өдөртөө хэрэглэж дуусгах
• -Гадаа аагим халуун болж, агаарын хэм +31 хэм хүрч байгаа үед худалдан авсан хүнсний бүтээгдэхүүнээ автомашиндаа хадгалахгүй байх
• -Хүүхдүүдийг хөдөлгөөнт тоглоом тоглуулахдаа аюулгүй байдлыг бүрэн хангуулах буюу хувь хүмүүсийн баталгаагүй, зориулалтын бус тоглоом дээр тоглуулахгүй байх
• -Нарны хурц туяанаас хамгаалж, малгай, нарны хаалт тогтмол хэрэглэх, наршихаас хүүхдүүдийг хамгаалах
• -Хүүхдийг гадаа тоглосны дараа болон гаднаас орж ирсний дараа даруй гарыг савандаж угаалгах

Баярын өдрөөр хүн ихтэй газруудад хүнсний бүтээгдэхүүн худалдаалах тохиолдол олон байдаг. Тиймээс эцэг, эхчүүд баярын үеэр хүүхэддээ бэлэг болон хүнсний бүтээгдэхүүн худалдан авахдаа найдвартай газраас, хадгалах хугацаа дууссан, хадгалалтын горим зөв явагдаж байгаа эсэхийг сайтар шалгаж худалдан авах хэрэгтэй. Гудамж талбайд ил задгай худалдаалж буй жимс, чихэр, бэлэг зэргийг худалдан авахгүй байх нь зүйтэй. Мөн дулааны улиралд олон цагаар нар, салхинд байгаа бүтээгдэхүүн чанарын шаардлага хангахгүй, хүний биед сөргөөр нөлөөлдөг болохыг анхаарууллаа.

А.Уянга