МАН-ын Хяналтын хорооны даргаар Б.Баярбаатарыг томилжээ

МАН-ын Хяналтын хорооны даргаар Б.Баярбаатарыг томиллоо. Хяналтын Ерөнхий Хороог Намын Их хурлаас 15 хүртэл гишүүний бүрэлдэхүүнтэйгээр дараагийн Их хурал хүртэл сонгон ажилуулдаг.

2017 онд Монгол Ардын Намын XXVIII Их хурлаар Хяналтын Ерөнхий хорооны даргаар Д.Батбаатар томилогдон ажиллаж байсан бөгөөд тэрбээр Монгол Улсын Засгийн газрын 2020 оны наймдугаар сарын 5-ны өдрийн хуралдаанаар Боловсрол, шинжлэх ухааны яамны Төрийн нарийн бичгийн даргаар томилогдсон тул МАН-ын Намын байгуулалтын газрын дарга Б.Баярбаатарыг түүний оронд томиллоо.

Б.Баярбаатар нь 1981 онд Улаанбаатар хотод төрсөн. 1988-1998 онд Нийслэлийн 48-р дунд сургууль, 1998-2003, 2010-2013 онд “Шихихутаг” хууль зүйн дээд сургуулийг тус тус төгссөн. Эрх зүйч мэргэжилтэй. Хууль зүйн ухааны магистр.

АЖЛЫН ТУРШЛАГА
• 2003-2004 онд УИХ-ын Тамгын газарт АБГББ хорооны даргын туслах
• 2004-2006 онд УИХ-ын дэд даргын шадар туслах
• 2006-2008 онд УИХ-ын даргын шадар туслах
• 2008-2011 онд УИХ дахь Монгол Ардын Намын ахлах референт
• 2011 оноос Монгол Ардын Намын Удирдах Зөвлөлийн Хэрэг эрхлэх газарт Нийгмийн бодлогын байнгын хорооны дарга, Намын байгуулалтын хэлтэст улс төрийн ахлах ажилтан
• Монгол Ардын Намын Бага хурлын гишүүний сонгуульт ажилтай
• 2016-2020 онд Намын байгуулалтын газрын даргаар тус тус ажиллаж байсан

Монгол Ардын Намын Хяналтын Ерөнхий Хороо нь намын дүрмийн биелэлт, боловсон хүчний бодлогын хэрэгжилт, намын байгууллагын санхүү, аж ахуйн үйл ажиллагаанд хяналт тавихаас гадна намын гишүүдээс гаргасан гомдлыг хянан шийдвэрлэх, нам, түүний гишүүдийн нэр төрийг хамгаалах, намаас төрийн болон намын удирдах албан тушаалуудад санал болгож сонгогдож, томилогдсон гишүүдийн ёс зүйн зөрчлийг шалгаж дүгнэлт гаргах гэх мэт эрх үүрэгтэй билээ.