Монгол Улс дахиад л шатахуундаа оочерлож эхлэв. Энэхүү үүсээд буй нөхцөл байдлын талаар ШТС-ууд хойд хөршийн “Роснефть” компаниас ачигдах учиртай байсан АИ92 шатахууны ачилт багассан, нөөц нь хангалтгүй болсон гэх тайлбар хэлж, шатахуун олголтоо хязгаарлаж буй юм. Гэтэл Уул уурхай, хүнд үйлдвэрийн сайд Г.Ёндон газрын тосны бүтээгдэхүүн, АИ-92 автобензиний нийлүүлэлт хэвийн үргэлжилж байгаа хэмээн мэдэгдлээ. Түүгээр зогсохгүй Г.Ёндон сайд ингэж зохиомол асуудал үүсгэж байгаад Тагнуулын ерөнхий газраар шалгуулна гэдгээ мэдэгдэв. Үнэндээ шатахуун импортлогчид ийм увайгүй үйлдэл гаргаж, дуртай үедээ дуртай “зохиолоо” бичээд байвал Монгол Улс төртэй гэдгээ мэдрүүлэх цаг нь болсон…
Энд салбар яамнаас гаргасан албан мэдэгдлийг бүрэн эхээр нь хүргэж байна.
Тодруулбал, “БНХАУ-аас 2021оны 09 дүгээр 27-оос 10 дугаар сарын 02-ны хооронд 200 вагон 10131 тн, ОХУ-аас 9 дүгээр сарын 27-оос 30-ны өдрүүдэд 1573 тн шатахуун орж ирсэн.
Цаашид хоёр улсаас шатахууны татан авалтыг хэвийн үргэлжлүүлж 10 сард ОХУ-аас 54880 тонн шатахуун оруулж ирэхээс эхний ээлжийн 33 вагон энэ сарын 2-ны өдрөөс ачигдан Улаанбаатар хотод нийлүүллээ.
Харин БНХАУ-аас энэ сард 12700 тн шатахуун оруулж ирэхээс эхний 50 вагон 4-ны өдөр орж ирсэн ба дараагийн 100 вагон буюу 5000 тн-ыг Замын-Үүдийн Шингэн түлш шилжүүлэн ачих байгууламжид шилжүүлэн ачиж байна.
Өмнөд хилээр орж ирсэн шатахууныг шилжүүлэн ачих ажлыг “Шингэн түлш шилжүүлэн ачих байгууламж” ТӨҮГ 24 цаг бүтэн ээлжээр ажиллаж, хоногт 50 вагон бүтээгдэхүүнийг Улаанбаатар хот руу нийлүүлж байна.
Мөн ОХУ-аас 10 дугаар сарын 02-ны өдөр ОХУ-ын “Роснефть” компаниас 13 вагон 787 тн, 10 сарын 3-ны өдөр 5 вагон 302 тн, 10 сарын 4-ний өдөр 368 тонн, 10 сарын 5-ны өдөр 542 тн газрын тосны бүтээгдэхүүн ачигдсан бөгөөд эхний ээлжийн бүтээгдэхүүнүүдийг импортлогч компанийн агуулахуудад нийлүүлж эхэлсэн.
БНХАУ, ОХУ-аас импортолж буй АИ-92 автобензинийг төмөр замын хуваарьт оруулах, төмөр замын тээвэрлэлтийг саадгүй, шуурхай гүйцэтгэх, Сүхбаатар, Замын-Үүд боомтоор яаралтай татан авах асуудлаар УУХҮЯ нь Гадаад харилцааны яам, Зам, тээврийн хөгжлийн яам, Монгол Улсаас ОХУ, БНХАУ-д суугаа Элчин сайдын яамд, Улаанбаатар төмөр зам, Шингэн түлш шилжүүлэн ачих байгууламж болон бусад холбогдох байгууллагуудтай хамтран, холбогдох арга хэмжээг авч, шуурхай ажиллаж байна.
Өнөөдрийн байдлаар улсын хэмжээнд АИ-92 автобензиний 7 хоногийн, Улаанбаатар хотын хэмжээнд 5 хоногийн ердийн нөөцтэй, нийлүүлэлт хэвийн явагдаж байна” гэжээ.
