Шингэх наранд, ирэх цагийнхан…

Цаг тутам тайван жагсаалын дүрмээ танилцуулах юм. Хажуугаас чинь хүн татвал, цохиод өшиглөөд авбал, нулимж доромжилбол, үсдээд өдвөл тэр болгонд хариу үйлдэл хийхгүй тайван байхыг сануулах юм. Ногоон хиймэл дэвсгэр хүрэлцэхгүй, хүйтэн чулуун дээр хүрмээ дэвсээд суухаас аргагүй, ар нуруунаас ээж байсан нар алгуур сэрүүн салхиар солигдож, хоёрхон цаг суух хооронд 20 хоног тэнд хаврын хамгийн зэврүүн сарыг элээсэн залуусыг хараад бахархах сэтгэл түрж, хаана ч юм гээгдсэн итгэл эргээд сэргэхийг мэдрэх…ядаж байхад чанга яригч нь ядруухан, талбайн нөгөө талд цугласан сөрөг жагсаалынхны хүчин чадал нь хүзүүнээс давсан чанга яригчийн дуунд дарагдаж, хаа нэг босч зогсмоор санагдан хөл чилэх…Залуусын маань чанга яригч паргисаар байгаад бүр дуугүй болж авлаа, бүгд тэвчээртэй суусаар… хэн нэг нь амь залгуулж байгаа бололтой, ямартай ч аргаа олоод цаг орчмын дараа дахин микрофон ажиллаж эхлэх…лайв, видео рийлээс харахад цоглог залуус, очоод дунд нь ороход аргагүй цуцсан, нүднийх нь гал бүдгэрсэн, олон хоногийн суултанд ядрах талдаа орсон байсан, нэгэн үеийн залуусын итгэл, бөхөх дургүй, бүүдийгээд ч гэсэн ассаар байгаа найдвар…бүрэнхий болж, тарж эхэллээ, хамтдаа ирсэн хүү, охин хоёрыг сөрөг жагсаалын хижээл эгч зориуд унатал түлхээд,

-Золбин юм чинь яаж байна ааа гэж бүдүүлгээр орилох. Араас нь эвгүй харцтай эр шалтгаан гармагц яахаас ч буцахгүй хялалзан анах…

-Хоёр талаасаа цуваад таръя, хоёр талаасаа эхлээд босоорой, болгоомжтой хариарай гэж нөгөө л дүрмээ сануулсаар жагсаал зохион байгуулагчид цуцалтгүй учирлах…

-Оройн ээлжтэй, хоцрох нь ээ гэж эцэг хүн утсаар эхнэртээ учирлаад, ажлын хувцастайгаа алхаж одох, зөөгчийн хормогчин дээр хүрмээ өмссөн хүү явж ядан хоргодон зогсох…тэд зүгээр л орлогоо нотлохыг л шаардсан даа! Хамгийн хүлээцтэй байснаараа тэд хамгийн хүртээмжтэй жагсаалыг хамтдаа бүтээв. Үеэ элээгээд бид явж, үеэ эзлээд тэд үлдэнэ! 20 хоног…өдөр болгон хэдэн цагаар суух…өмссөн хүрэм нар салхинд гандаж, өмдний өвдөг нимгэртлээ элэгдэж, нүүр харлаж, гар сайртах өдрүүд…асар майхнуудад шахагдаж, аргагүйдэн дарамтлуулж, арга хэмжээнүүдийн дунд уусан үл үзэгдэж… надаас хэзээ ч гарахгүй тэвчээр надаас хойших үеийнхэнд байхыг харах…олон цаг суух хэцүү, гэвч очоод л баймаар….

Нийтлэлч Р.Эмүжин