Я.Содбаатар: Ерөнхийлөгчийг Хятадаар ярьсан гэх бичлэгийг тараасан хоёр Монгол иргэнийг олж тогтоон шалгаж байна

Ерөнхийлөгчийн Тамгын газраас мэдэгдэл гаргав.

Тэрхүү мэдэгдэлд “Сүүлийн үед хэвлэл мэдээлэл, нийгмийн сүлжээнд Монгол Улсын үндэсний аюулгүй байдалд заналхийлсэн, Монгол Улсын нэр хүнд, гадаад харилцаанд илтэд сэв суулгах зорилго бүхий Ерөнхийлөгчийн нэр төрд халдсан хуурамч мэдээ, мэдээлэл удаа дараа явуулах боллоо.

Нийгмийн сүлжээнд нэр бүхий хаягаас орчин үеийн технологи, программ ашиглан Ерөнхийлөгчийг хятад хэлээр ярьж буй мэт хуурамч мэдээлэл байршуулсан нь мөнхийн хөрш хоёр орны ард түмний харилцаанд зориуд сэв суулгахуйц ноцтой үйлдэл болсонд туйлаас харамсаж байна.

Энэ нь улс орны үндэсний аюулгүй байдлын эсрэг, Монгол Улсын нэр хүнд, тэр тусмаа хөрш орнуудын найрсаг харилцаанд ноцтой заналхийлсэн үйлдэл болж байна.

Монгол Улсын Үндсэн хуульд зааснаар Ерөнхийлөгч нь эх орноо гадаад харилцаанд бүрэн эрхтэй төлөөлдөг албан тушаалтан тул төрийн тэргүүний нэр төр, халдашгүй байдлыг хуулиар хамгаалдаг.

Иймд хөрш орнууд, олон улсын тавцанд Монгол Улсын нэр хүндийг унагах, байр суурийг гуйвуулах, Ерөнхийлөгчийн нэр төрд халдах аливаа хууль бус үйл ажиллагааг таслан зогсоолгохоор хууль хяналтын байгууллагад хандаж буй болохыг үүгээр мэдэгдэж байна.

Нийгмийн сүлжээ ашиглаж байгаа иргэд, хэвлэл мэдээллийн ажилтан та бүхнийг аливаа мэдээллийн үнэн бодит байдал, эх сурвалжийг нягталж , холбогдох мэдээллийг олон түмэнд түгээж, хариуцлагатай хандаж байхыг анхааруулж байна” гэв.

Мэдэгдэлтэй холбогдуулан Ерөнхийлөгчийн Тамгын газрын дарга Я.Содбаатар нар нэмэлт мэдээлэл өгөв.

Дээрх мэдээ, мэдээллийг нийгмийн сүлжээнд оруулж, зохион байгуулалттай хийсэн хоёр монгол иргэнийг хууль хяналтын байгууллагууд олж тогтоон шалгаж байна. Мөн энэ асуудлаар БНХАУ-ын холбогдох байгууллагад ч ханджээ.

2022-2023 оны хичээлийн шинэ жилийн нээлтэд зориулж “Ерөнхийлөгчийн цаг” нэвтрүүлэгт зориулж хийсэн дүрс бичлэгийг тусгай програм ашиглаж эвлүүлсэн байна.

Улс орны тусгаар тогтнолтой холбоотой, үндэсний аюулгүй байдалд заналхийлсэн, гуравдагч хөршийн бодлогод сэв суулгахуйц үйлдлийг зохион байгуулалттай хийж байгааг Тамгын газрын дарга Я.Содбаатар хэлэв.

Тухайлбал, гурван сарын өмнө Монгол Улсын хилийн зурвасыг дотогш нь татсан тухай хуурамч мэдээллийг зохион байгуулалттай цацсаныг хууль хяналтын байгууллага тогтоосон гэдгийг тодотгов.

Үндэсний аюулгүй байдалтай холбоотой гэмт хэрэг цар хүрээ өндөртэй, энэ хэрээр улсаараа хохирч болох эрсдэлтэй гэдгийг Ерөнхийлөгчийн Хууль зүйн бодлогын зөвлөх А.Бямбажаргал хэллээ.

Иймээс ард иргэд аливаа мэдээ, мэдээллийн үнэн бодит байдал, эх сурвалжийг нь нягталж байх, хэвлэл мэдээллийн байгууллагууд ч энэ чиглэлээр зөв мэдээлэл өгч байхыг хүслээ.