“Өвсний үндэс” хөтөлбөр Дархан-Уул аймагт хэрэгжинэ

УИХ-ын гишүүн Г.Дамдинням, Дархан-Уул аймгийн Засаг дарга Б.Азжаргал, Шарын гол сумын 17-р цэцэрлэгийн эрхлэгч Д.Оюунцэцэг нар Япон улсаас Монгол улсад суугаа Онц бөгөөд Бүрэн эрхт Элчин сайд Х. Кобаяашитай уулзаж, буцалтгүй тусламжийн гэрээ байгууллаа.

Тодруулбал, Япон улсын Засгийн газраас хөгжиж буй орнуудад хэрэгжүүлдэг “Өвсний үндэс- Хүний аюулгүй байдлыг хангах” хөтөлбөрийн хүрээнд Дархан-Уул аймгийн Шарын гол сумын 17-р цэцэрлэгт 400 сая төгрөгийн хөрөнгө оруулахаар болжээ. Уг санхүүжилтийг цэцэрлэгийн барилгыг засварлан өргөтгөх, тоног төхөөрөмжийг сайжруулахад зарцуулах аж.

Уулзалтын үеэр УИХ-ын гишүүн Г.Дамдиннямын зүгээс Монгол хүүхдүүдийн сурч, боловсрох таатай орчинг бүрдүүлэх, аюулгүй байдлыг хангахад анхаарал хандуулж, бодитой дэмжлэг үзүүлж буй Японы ард түмэн болон Засгийн газар, ЭСЯ-ны хамт олонд талархаж буйгаа илэрхийллээ.

“Өвсний үндэс” хөтөлбөр нь төрийн бус байгууллага, эмнэлэг, ерөнхий боловсролын сургууль, эрдэм шинжилгээний хүрээлэн болон бусад ашгийн бус байгууллагуудад хөгжүүлэх төсөл хэрэгжүүлэхэд нь санхүүгийн буцалтгүй тусламж үзүүлдгээрээ онцлогтой юм байна.