Уйлаант Удирдах зөвлөлийн араас сэм уулзалт, шинэ бүлэглэлүүд үүсч эхэллээ

Х.Булгантуяа аврал эрэн уйлж, уучлал гуйсан талаар намынхан нь дээр доргүй яриад эхэлж. Үндсэн хууль зөрчсөн нь Цэцийн их суудлын хуралдаанаар тодорхой болсон түүнийг УИХ-ын гишүүнээс нь эгүүлэн татаад зогсохгүй 8-12 жилийн ял хүлээж байж мэдэхээр байгаа. Тиймээс намынхаа Удирдах зөвлөлийн хурлын үеэр уучлал өршөөл эрж, УИХ-ын гишүүнээс нь эгүүлэн татахгүй байхыг уйлан хайлан гуйсан гэлцэж байна. Тэрчлэн 2028 оны сонгуульд нэр дэвшилгүй улстөрөөс холдоно гэсэн тул намын дэд даргын суудлаас нь буулгах, бусад гарц шийдлийн талаар Удирдах зөвлөл дээр ярилцсан юм байх.

Нөгөөтэйгүүр намын Их хурлаар Д.Амарбаясгаланг батламжлахгүйгээр даргаа сонгоно гэдгийг Я.Содбаатар мэдэгдчихээд байгаа.

Улмаар Улстөрийн намын тухай хуулийг дагаж мөрдөх журмын дагуу дүрмэндээ өөрчлөлт оруулах ч ялалт байгуулсан намын дарга Засгийн газраа тэргүүлнэ гэх заалтыг өөрчлөхгүй гэх байр суурь дээр дийлэнх гишүүн хөдлөшгүй зогссон гэдгийг эх сурвалжаас хэлж байна. Эл дүрэм, байр суурийн дагуу Г.Занданшатар өрсөлдөгчгүйгээр намын дарга болох мэдээллийг ч мөн өгч буй юм.

Д.Амарбаясгаланг намын даргаар бүртгүүлэх албан бичиг Улсын Дээд шүүх рүү хүргэгдэх бүү хэл бүрдүүлэлт ч хийгдээгүй байгаа. Намын дарга болох байтугай Ч.Хүрэлбаатараар ахлуулсан эвлэрүүлэн зуучлах ажлын хэсэг нэр дор ачигдах уу, эвлэрэх үү бичигт гарын үсэг зурах уу гэх тулгалт хийгдсэн талаар жиг жуг гэлцээд эхэлж.

Мөн хурлын үеэр Засгийн газрын бүтцэд өөрчлөлт оруулах тухай ч яригдсан бололтой.

Л.Энх-Амгаланг УИХ-ын даргаар, З.Мэндсайханыг дэд даргаар томилохоос гадна хамтарсан Засгийн газар байгуулж, АН-д урилга хүргүүлэх юм байх. Энэ тохиолдолд Б.Пүрэвдорж Тэргүүн Шадар сайд болж, түүний оронд УИХ-ын дэд даргын албыг Ж.Баярмаа залгамжлах шуум байна.

Ажиллаж буй танхимаа огцруулах кноп дарсан С.Амарсайханыг Я.Содбаатараар солих гэнэ.

Эдгээр санал тохирооны зэрэгцээ Сангийн сайд Б.Жавхланг чөлөөлж, УИХ-ын дэд дарга болгох тухай яригдсан ч шийдэлд хүрээгүй, Б.Дэлгэрсайхан, Б.Чойжилсүрэн нарыг чөлөөлье гэсэн ч “мөнгөө тушаасан” гэдгээр үлдэх болсон юм байх.

Эх сурвалжуудын өгч буй дээрх мэдээллээс гадна намын Их хуралд аймгийн Засаг дарга нарын нөлөө их байдгаас Засаг дарга нарыг Авлигатай тэмцэх газраас шалгаж эхэлсэн талаар А.Ариунзаяа хэвлэлийнхэнд ам алдаж харагдсан. Тэрбээр “Би айдастай байна. МАН-ын даргын сунгааны дараа залуу гишүүдийг дарамтлах, аймаг сумын Засаг дарга нарыг хянаж, шалгаж эхэлсэн” гээд Увс аймгийн Засаг дарга С.Батжаргал зуурдаар нас барсан явдлыг яриан завсраа хавчуулаад үгээ тасалсан нь үхэл зовлонг улстөржүүллээ гэх шүүмжлэл дагуулж, олны дургүйцлийг төрүүлээд байгаа.

Мөн хотын дарга Х.Нямбаатарыг Авлигатай тэмцэх газраас шалгаж эхэлсэн байж болзошгүй мэдээллийг эх сурвалжаас өгч байна. Түүнийг огцруулах акц өрнөж нийслэлийн намын хороог салгаж авах ажиллагаа ч хийгдэж мэдэх гэнэ.

Энэ бүгдийн зэрэгцээ Удирдах зөвлөлөөс байгуулагдсан хоёр хоногийн хугацаатай ажлын хэсгээс Ж.Бат-Эрдэнийг УИХ дахь намын бүлгийн даргын ажлаа өгөхийг шаардсан, мөн үеэр Д.Амарбаясгалан Бага хурлаасаа эхлүүлэн намаа ийм байдалд хүртэл явуулсандаа уучлал гуйсан талаар зарим гишүүн хэлж байгаа ч цөөнгүй нь үгүйсгэж байна.

Ямартай ч түүнийг яллагдагчаар татагдсаныг Хууль зүй дотоод хэргийн сайд Б.Энхбаяр мэдэгдсэнийг бид мэдэх бөгөөд ойрын хугацаанд бүрэн эрхийг түдгэлзүүлэн шалгах асуудлыг Прокурорын байгууллагаас оруулж ирнэ гэж байгаа.

Энэ мэт байдлаар Г.Занданшатар намын дарга болох хөшүүргээ Б.Энхбаяраар дөрөөлөн хийж, Үндсэн хуулиар олгогдсон бүрэн эрхийнхээ хүрээнд Засагтаа засвар хийн АН-ыг нэмээд уртын аяндаа бэлдэж буй гэх ч Ерөнхийлөгчийн зүгээс өөр шийдэл мөн дуулдаад эхэлж.

Их хурал болтол зай ч байна, лай ч бий бөгөөд бадарчин баярлахад эрт шүү гэсэн намын бүлэг фракциудын сэм уулзалт энд тэнд өрнөж эхэлсэн мэдээллийг эх сурвалжаас ирүүлж байна.

Тиймээс энэ талаарх мэдээллийг дэлгэрэнгүйг үргэлжлүүлэн хүргэнэ.