Хогийн савнаас олдсон нярай нас баржээ

Нэр бүхий сүлжээ дэлгүүрийн хогийн саванд дутуу төрсөн нярайг эх нь хаясан хэрэг 2020 оны аравдугаар сарын 1-нд гарсан.
Эх, хүүхдийн эрүүл мэндийн үндэсний төвд хүргэгдсэн нярайн биеийн байдал хүнд байсан бөгөөд сар гаруйн хугацаанд шаардлагатай эмчилгээнүүдийг хийж байсан ч өнгөрсөн шөнө эндсэн байна.

Энэ талаар ЭХЭМҮТ-өөс тодруулахад “Нярайн биеийн байдал хүнд байсан. Аравдугаар сарын 1-нд ЭХЭМҮТ-д ирснээс хойш хоёр удаа мэс засалд оруулж, шаардлагатай эмчилгээнүүдийг шат дараатайгаар хийж байв. Гэвч нярайн биеийн байдал хүнд байсаар арваннэгдүгээр сарын 3-4-нд шилжих шөнө 02:00 цагт нас барсан” гэлээ.

Тухайн нярайг хогийн саванд хаясан эхэд Эрүүгийн хуулийн 10.1-т зааснаар зүйлчилж, хэрэг үүсгэн шалгаж байгааг ЦЕГ-аас мөн мэдээллээ. Эрүүгийн хуулийн 10.1-т “Хүнийг алсан бол найман жилээс арван таван жил хүртэл хугацаагаар хорих ял шийтгэнэ” гэж заасан байдаг аж.