Монгол Улсын 2020 оны орон нутгийн сонгуулийн санал хураалт хаяанд ирлээ. Нийслэлийн Иргэдийн Төлөөлөгчдийн Хурлын 2020 оны сонгуульд дэвшүүлж оролцож буй мөрийн хөтөлбөрөөрөө нам, хүчнүүд өрсөлдөж, өдгөө Монгол Улс даяар бодлогын өрсөлдөөн өрнөж буйг энд тэмдэглэе. Тэдгээрээс нийслэл хотыг хөрөнгө оруулалт, хөдөлмөр эрхлэлтийг дэмжсэн, сайн засаглалтай, түгжрэлгүй, утаагүй, орлогод нийцсэн орон сууцтай, хүртээмжтэй чанартай боловсролтой, хүн төвтэй эрүүл мэндийн үйлчилгээ бүхий, хүндээ ээлтэй, амьдралын таатай орчинтой, ногоон байгууламжтай, аюулгүй болгох чиглэлээр Нийслэлийн Монгол Ардын Намын хорооноос дэвшүүлж буй бодлогыг энд онцлон дурдахыг хүсэж байна.
Улс орны хөгжлийг зөвхөн эдийн засгийн чадавх төдийгүй нийгэм, хүний хөгжлийг нь харгалзан үнэлдэг. Тэгвэл улс орны хөгжлийн тулгуур болсон эдгээр гурван баганад нийслэлийн Монгол Ардын Нам ижил тэнцүү өндөр ач холбогдол өгч буйг тэмдэглэе. Юуны өмнө эдийн засгийн талын бодлогыг задалж анзааръя. Хөрөнгө оруулалт, хөдөлмөр эрхлэлтийг дэмжсэн хот байгуулна хэмээн онцолсон байна. Нийслэлийн үнэт цаас гаргаж, санхүү, хөрөнгө оруулалтын чадавхыг дээшлүүлэн, нийгэм, эдийн засгийн тулгамдсан асуудлыг шийдвэрлэхээр энэ хэсэгт тусгасан байгаа юм. Улмаар хотыг хөгжүүлэх таван жилийн үндсэн чиглэл, хотын хөрөнгө оруулалтын хөтөлбөр боловсруулахаар төлөвлөжээ. Жижиг дунд үйлдвэрүүдийг түлхүү дэмжих замаар эдийн засгийн хямралыг даван туулах, улмаар хүнсний аюулгүй байдал болон шинжлэх ухаан, технологи, аялал жуулчлал, үйлчилгээлний салбарт голлон анхаарч, нийслэлийн өрсөлдөх чадварыг дээшлүүлэх стратегийг нийслэлийн МАН мөрийн хөтөлбөрөөрөө дамжуулан томьёолсон байна.
Иргэндээ нээлттэй, чирэгдэлгүй, үр дүнтэй хотын үйлчилгээг үзүүлэхэд хотын сайн засаглал чухал. Тэгвэл дижитал шилжилт, техник технологийн хөгжлийг дэмжих замаар ухаалаг, аюулгүй хотыг бий болгохоор төлөвлөснийг нь мөн мөрийн хөтөлбөрөөс нь харж болно.
Нийслэлийн иргэдийн цаг зав, хөрөнгө, эрүүл мэндэд хамгийн их эрсдэл учруулж буй нь түгжрэл, бас утаа. Тэгвэл эдгээр асуудлыг шийдвэрлэх цогц төлөвлөгөөг МАН мөн мөрийн хөтөлбөртөө хөндсөн байгаа нь анхаарал татаж байна. Өнгөрсөн нэг өвлийн хугацаанд нийслэлийн агаарын бохирдол эрс буурсан. Тэгвэл энэ бодлогоо тэд үргэлжлүүлж, хий болон цахилгаан халаагуураар шийдвэрлэж, нийслэлийн хөгжлийг олон улсын шинэ цагийн хандлагатай нийцүүлэхийг эрмэлзэж байна. Тэрчлэн ухаалаг тээврийн сүлжээг бий болгох, гудамж, замын даац, нэвтрүүлэх чадварыг нэмэгдүүлэх гэхчлэн нийслэлийн иргэн бүрийн өмнө тулгамдсан асуудлыг шийдэхээр зорьжээ.
Орон сууц, боловсрол, эрүүл мэндийн салбарт мөн шинэлэг шийдэл санал болгож байна. Орлогодоо нийцсэн орон сууцтай болгох, танхимын сургалт төдийгүй онлайн, зайн сургалтыг хөгжүүлэх, эрүүл мэндийн цахим үйлчилгээг нэвтрүүлэх гээд нийслэлийн иргэн бүрт хамаатай нийгмийн асуудлыг цэгцэлж, хүн төвтэй хот, хүн төвтэй хөгжлийг эрчимжүүлэхээр зэхэж байна.
Эцэст нь дүгнэн хэлэхэд, Монгол Ардын Нам өнгөрсөн дөрвөн жилийн хугацаанд нийслэлийн бодлогыг тодорхойлж, түүгээрээ дамжуулан Улаанбаатар хотын нэн шинэ хөгжлийг гардан удирдлаа. Өнгөрсөнд эхлүүлсэн бодлого, шийдэл нь хэр үр дүнтэй, иргэдийн амьдралд хэр наалдацтай байсныг өдгөө та, бид харж, мэдэрч суугаа. Тэгвэл эхлүүлсэн ажлаа дуусгаж, төлөвлөсөн ажлаа гүйцэлдүүлэх дахин дөрвөн жилийн боломжийг тэдэнд олгоход эргэлзэх зүйл үгүйг тэдний өнгөрсөнд хэрэгжүүлсэн бодлого шийдэл, өдгөө санал болгож буй мөрийн хөтөлбөр харуулж байна.
