Зөрчилтэй ломбардуудыг торгож эхлэв

Хулгайн аргаар олсон компьютер, нөүтбүүк, гар утас, зурагт болон бусад үнэд хүрэх эд зүйлсийг барьцаалан зээлдүүлэх газарт бусдын нэрээр тавьдаг зөрчил их байдаг. Үүнээс урьдчилан сэргийлэх, таслан зогсоох зорилгоор Баянзүрх дүүргийн цагдаагийн II хэлтэс “Ломбард” арга хэмжээг хариуцсан хороодын нутаг дэвсгэрт зохион байгуулан ажиллаж байна. Тус хэлтсийн хариуцсан хороодын нутаг дэвсгэрт барьцаалан зээлдүүлэх 71 аж ахуй нэгж үйл ажиллагаа явуулж байна.

Алба хаагчид аж ахуй нэгжүүдийн үйл ажиллагаа явуулах зөвшөөрөл, эд зүйл хадгалах хүндрүүлэгчтэй сейф, хяналтын камер, үйлчлүүлсэн иргэдийн бүртгэл зэрэгт хяналт шалгалт хийжээ. Хяналт шалгалтын үеэр зөрчил илэрсэн 24 аж ахуй нэгж байгууллагад Зөрчлийн тухай хуулиар нийт 22 сая 800 мянган төгрөгийн торгууль ноогдуулжээ.