Д.Жавхлан, М.Амарболд нарт холбогдох хэргийн шүүх хурал хойшиллоо

“Очир” төвд амиа алдсан 13 настай охиныг архинд хордуулж, хүчирхийлүүлэн амь насыг нь хөнөөсөн байж болзошгүй иргэн Д.Жавхлан, М.Амарболд нарт  холбогдох шүүх хурал өнөөдөр 10.00 цагт Баянзүрх дүүргийн Эрүүгийн хэргийн анхан шатны шүүхэд эхэлсэн ч  энэ сарын 23-ны 10.00 цаг хүртэл хоёр хоног хойшлуулжээ. Учир нь шүүгдэгч Д.Жавхлангийн өмгөөлөгч О.Цэрэнпунцаг эмнэлгийн байгууллагад шинжилгээ өгөх үндэслэлээр хойшлуулах хүсэлтийг бичгээр гаргасан байна.  Мөн иргэн О.Баасанхүү шүүх хуралдаанд ажиглагчаар оролцох тухай хүсэлт бичгээр гаргажээ.  Шүүх бүрэлдэхүүн хүсэлтүүдийг шийдвэрлэсэн байна.

Шүүх бүрэлдэхүүн шүүгдэгч нарт авсан цагдан хорих таслан сэргийлэх арга хэмжээг хэвээр үргэлжлүүлэхээр шийдвэрлэж, иргэн О.Баасанхүүгийн хүсэлтийг хүлээн авахаас татгалзжээ. Шүүх хуралдааныг хаалттай явуулж байгаа, түүнчлэн хохирогчийн эрх ашгийг хамгаалан Т.Лхагвасүрэн, С.Баясгалан нар, тэдний эрх, хууль ёсны ашиг сонирхлыг хамгаалан, хууль зүйн туслалцаа үзүүлэхээр өмгөөлөгч Р.Булгамаа, Г.Батбаяр, Х.Баасанжаргал нар оролцоно.  Иймд хаалттай явуулах шүүх хуралдаанд хэргийн оролцогч нараас өөр хүнийг оролцуулах боломжгүй гэж үзлээ.
Мөн шүүгдэгчийн өмгөөлөгч О.Цэрэнпунцагийг Зөрчлийн тухай хуулийн 15.7 дугаар зүйлийн 2-т заасан “Хэрэг хянан шийдвэрлэх ажиллагаанд саад учруулах” зөрчлийг гаргасан гэж үзэж, шүүхээс 300,000 төгрөгөөр торгох шийтгэл ногдууллаа.