Үйлдвэр байгуулагдсан түүхээс сонирхвол, үүсгэн байгуулагч, ерөнхий захирал Д.Отгонсүх монгол орноороо олон жил аялахдаа төрөл бүрийн чулууны арвин их нөөцтэй болохыг анзаарч, энэ их баялгийг эдийн засгийн эргэлтэд оруулж,  импортыг орлох, нэмүү өртөг шингэсэн бүтээгдэхүүнийг дотооддоо үйлдвэрлэх юмсан гэсэн  хүсэл эрмэлзлээ ажил хэрэг болгож чаджээ.

Үйлдвэрлэлдээ дундад зууны үеэс эхлэн олон зуун жилийн турш байгалийн чулууг боловсруулан, хот суурин газар, цайз цамхгуудыг байгуулсаар ирсэн Англи улсын технологийг  нэвтрүүлсэн аж. Мөн Швейцар улсын эрс тэс уур амьсгалд тэсвэртэй, олон арван жилийн эдэлгээ даах чанартай брэнд бүтээгдэхүүн үйлдвэрлэхэд шаардлагатай түүхий эдийн сонголт, түүнд тавигдах стандарт шаардлагаас эхлүүлээд үйлдвэрлэлийн барилга, байгууламжийн зай талбайд тавигдах шаардлага, мэргэжилтнүүдийн сургалт хөгжил, мэдлэг ур чадвар хүртэл үйлдвэрлэлийн технологи хийгээд менежментийн цогц ноу-хаугаар бүтээгдэхүүнээ үйлдвэрлэж байна.

Энэ хамт олон  бетонон бүтээгдэхүүний үйлдвэрлэлд европ стандартыг ягштал баримтлан, нийслэл хотынхоо өнгө төрхийг өөрчилье гэсэн чин хүсэл эрмэлзэлтэй ажилладаг нь хамгийн энгийн зүйлсээс ч харагддаг. Тухалбал, эцсийн бүтээгдэхүүний чанар чансааг тодорхойлогч гол хүчин зүйлсийн нэг болсон, Дархан-Уул аймагт бэлтгэсэн хайрга, кварц болон шохойн чулууг бүтээгдэхүүнийхээ түүхий эд болгон  ашигладаг байна. Түүнчлэн Дани улсын брэнд бүтээгдэхүүн болсон 52.5 марктай буюу нэг ам см талбайд 525 кг-ийн даац авах чадвартай цементээр бүтээгдэхүүнийхээ орцыг бүрдүүлдэг. Хэдийгээр 2-3 дахин хямд зардлаар, хотын ойролцоох бэлтгэн нийлүүлэгчдээс түүхий эд бэлтгэх боломж байдаг хэдий ч энэ нь Монголын бетонон бүтээгдэхүүний салбарыг хөгжүүлэхээр тууштай зорьсон эдгээр залуусын чин хүсэл эрмэлзэлтэй зөрчилддөг тул зөвхөн чанартай бүтээгдэхүүн үйлдвэрлэх зорилгоо умарталгүй дээрх сонголтыг хийсээр ирсэн байна. Үүгээр ч зогсохгүй  хэрэглэгч ашиглахад хялбар байдлыг хамгийн түрүүнд бодолцон, зуны бороотой хийгээд өвлийн цас, мөстэй үед халтартдаггүй гадаргуутайгаар яг л Швейцар, Английн гудамжнуудад алхаж буй мэт сэтгэгдэл төрүүлэхээр гоёмсог өнгө, дизайнтайгаар бүтээгдэхүүнүүдээ үйлдвэрлэдэг ажээ.Өнөөдрийн байдлаар Англи, Швейцар мэргэжилтнүүдтэй байнга хамтран ажилласны үр дүнд ханын  интерьер, экстерьерийн ес, гадна тохижилтын найман төрлийн хавтан, цэцэг, мод бутны дөрвөн янзын  сав үйлдвэрлэж, бүтээгдэхүүнийхээ нэр төрөл, сонголтыг улам нэмэгдүүлсээр байна.

Эдгээр залуусын цаашдын ажилд нь амжилт хүсч, эх орныхоо хот, суурин газруудыг  Английн Лондон, Швейцарын Женев шиг өвөрмөц содон өнгө төрхтэй болгохыг хичээн чармайж яваа ажил үйлст нь их амжилт хүсэн ерөөе.