Тэргүүн байр эзэлсэн Т.Өлзийжаргалын хөгжимдөх ур чадварыг багш нар нь магтжээ

Ёочин болон ёочин төст хөгжимчдийн олон улсын анхдугаар уралдааны мэргэжлийн, насанд хүрэгчдийн ангилалд Үндэсний урлагийн их театрын гоцлол хөгжимчин, Консерваторийн багш Т.Өлзийжаргал тэргүүлжээ.

Түүний багш нь уг уралдааны шүүгчдийн бүрэлдэхүүнд ажилласан, Шанхайн Консерваторийн профессор, Бүх Хятадын ёочинчдын зэрэглэл тогтоох байгууллагын гишүүн Чен Хай Хуа ажээ. Тэрбээр шавийнхаа тухай “Манай Өлзий сургууль төгссөнөөс хойш улам сайжирсан байна” гэсэн бол, СУИС, Консерваторийн үндэсний хөгжмийн багш нар түүний хөгжимдөх ур чадвар бусад багш, оюутнуудад сайнаар нөлөөлж байна хэмээж байлаа. Тэрбээр БНХАУ-ын Шанхайн Консерваторийг ёочин хөгжимчин мэргэжлээр гурван жилийн өмнө төгсөөд эдүгээ эх орондоо ажиллаж буй уран бүтээлч юм.