“Авлигын төсөөллийн индекс”-ийг зарлалаа

Өнөөдөр олон улсын “Транспаренси Интернэшнл” байгууллагаас 2017 оны “Авлигын төсөөллийн индекс”-ийг зарлалаа. Монгол Улс 36 оноо авч өмнөх оны үзүүлэлтээс 16 байраар ухарч 103 дугаар байранд эрэмбэлэгджээ. Өнгөрсөн жил 15 байраар ухарч 87 дугаарт эрэмбэлэгдсэн бөгөөд сүүлийн хоёр жилийн дотор 31 байраар ухарсан байна.

Тус судалгаанд нийт 180 орныг хамруулан авлигын түвшинг нь 0-100 оноогоор дүгнэжээ. Энэ жил улс орнуудын гуравны хоёр нь 50-аас доош буюу дунджаар 43 оноо авчээ. Шинэ Зеланд 89, Дани 88 оноо буюу хамгийн өндөр оноонууд авч нэг, хоёрдугаар байранд тус тус жагсаж байна.