Нийслэлд 20 сургууль, цэцэрлэгийн засвар дуусаагүй байна

2021 он гарснаас хойш Улаанбаатар хотод нийт найман сургууль, бага сургууль, цэцэрлэгийн хоёр цогцолбор, 16 цэцэрлэг, нэг дотуур байрыг ашиглалтад оруулжээ. 20 сургууль, цэцэрлэгийн засвар 81 хувьтай үргэлжилж байна.

Хичээлийн жил эхэлчихээд байхад засварын ажил дуусаагүй байгаа шалтгааныг цар тахлын улмаас компаниуд тендерт оролцохгүй байгаагийн дээр барилгын материалын татан авалт удаашралтай, үнэ ханш гэнэт өссөн зэрэгтэй холбон тайлбарлаж байна.

Нийслэлд энэ онд улс, нийслэл, дүүргийн төсөв, гадаадын зээл, тусламжийн хөрөнгөөр 57 цэцэрлэг, 32 сургууль, бага сургууль, цэцэрлэгийн есөн цогцолбор, хоёр спорт заал, насан туршийн боловсролын нэг төв, дотуур байрны нэг барилга гээд нийтдээ 102 барилга ашиглалтад оруулах төлөвлөгөөтэй байна. Мөн 69 сургууль, цэцэрлэгт урсгал болон их засвар хийхээр төлөвлөжээ.