Л.ЧИНБАТ: Энэ сарын 26-ны өдөр намайг дуудан ирүүлэх бичиг өгчихөөд эрэн сурвалжилж байна гэх юм…

 

 

Өнгөрөгч амралтын өдөр Цагдаагийн ерөнхий газраас “Гацуурт” ХХК-ийн гүйцэтгэх захирал Л.Чинбатыг эрэн сурвалжилж байгаа талаарх зар мэдээлэл цахим орчинд багагүй шуугиан дэгдээв.

Түүнийг тус байгууллагаас эрэн сурвалжлах болсон үндэслэлээ мөрдөн шалгах ажиллагааны явцад оршин суугаа газраа өөрчилсөн талаарх мэдээллээ мэдэгдээгүй, холбоо барих утасны дугаар луу залгахаар дуудлагад хариу өгөхгүй эрүүгийн хэрэг хянан шийдвэрлэх ажиллагаанд саад учруулахгүй байх үүргээ биелүүлэхгүй таслан сэргийлэх арга хэмжээг зөрчсөн гэж тайлбарласан байна. Л.Чинбатын талаарх мэдээллийг цагдаагийн байгууллагын 11327045 тоот утсанд авна гэжээ.

Харин энэхүү мэдэгдэлд “Гацуурт” ХХК-ийн гүйцэтгэх захирал Л.Чинбат өөрийн цахим хуудсаараа дамжуулан дараах тодруулгыг хийсэн юм.

Тэрбээр “Намайг цагдаагаас эрэн сурвалжилж эхэллээ гэжээ. Хаврын тариалалтын бэлтгэл ажлаар Сэлэнгэ аймгийн Цагааннуур суманд ажиллаж байнаа. Эрүүгийн Цагдаагийн Газраас надад нэг ч удаа өөрт мэдэгдээгүй, мөн манай өмгөөлөгчид 2021 оны 4-р сарын 26-ны өдөр намайг дуудан ирүүлэх бичиг өгчихөөд уг өдөр нь болоогүй байхад оргодол мэтээр улс орон даяар зарлаж, эрэн сурвалжилжээ. Урамшууллын мөнгө илүү авсан хэргээр 5 дахь жилдээ шалгагдаж байна. “Гацуурт” ХХК-ийг үүсгэн байгуулж, сүүлийн 20 гаруй жил газар тариалангийн салбарт үйл ажиллагаа явуулахдаа хавар, зун, намартаа өглөө 05 цагаас шөнийн 00 цаг хүртэл тариан талбай дээр ажиллаж өнждөг. Энэ хугацаанд ялангуяа цар тахалтай энэ хүнд цаг үед Монгол Хүндээ эх орныхоор хөрсөнд тарьж ургуулсан эрүүл хүнсийг хямд хүргэх зорилготой ажилласаар ирсэн. Улсаас нэг ч төгрөг хууль бусаар авч, хулгай хийж үзээгүй гэдгээ хариуцлагатайгаар хэлье. Тариалан Эрхлэлтийг Дэмжих Сантай 4 удаа урамшууллын мөнгөний асуудлаар тооцоо нийлээд өглөг, авлагагүй болохоо баталгаажуулсан актууд, урамшууллын мөнгөтэй холбоотой санхүүгийн баримтуудыг үзээд та бүхэн дор бүрнээ дүгнэлтээ хийнэ бизээ. Хууль хяналтын байгууллагын дарамт шахалтанд манай улсад шударгаар хөдөлмөрлөж, ажиллаж амьдрахад үнэхээр хэцүү болжээ. Одоо бол маш их туйлдаж байна” хэмээжээ.