Зам тээврийн яамны нээлттэй хаалганы өдөрлөгт зориулан нийслэлийн төв талбайд Хөвсгөл нуурын 50 метрийн гүнээс татан гаргасан “Яг-6М” загварын авто машиныг авчиржээ. Тус машиныг 2024 онд эл нуураас татан гаргасан юм. ЗХУ-д ердөө 50 ширхэг үйлдвэрлэгдсэн “Яг-6М” дэлхий дээр цор ганц үлдсэн нь энэ юм. Бусад нь дайны он жилүүдэд устаж үгүй болжээ.
5 тонны даацтай, америкийн “Hercules” мотортой, хус модон кабинтай энэ машин их буу тээвэрлэхээс эхлээд хүнд даацын техник зөөхөд зориулагджээ. “Яг-6М” авто машиныг гаргаж ирсний дараа ОХУ-аас шилжүүлэн өгөх хүсэлт Ерөнхийлөгчид хандан гаргасан ч төрийн тэргүүн зөвшөөрөөгүй, Монгол улсын сан хөмрөгт үүрд хадгалахаар шийджээ.
© 2017 newsmedia.mn. Бүх эрх хуулиар хамгаалагдсан.