Ж.Ганбаатар: Цаашид дизель түлш болон АИ92 бензиний үнэ нэмэгдэхгүй

Өнгөрөгч амралтын өдрүүдэд шатахууны хомсдол үүсч, иргэд бензин колонкийн гадаа 3-4 цаг дугаарлаж, нэлээд бухимдалтай байв. Харин энэ асуудлаар өнөөдөр салбарын сайд Ж.Ганбаатар мэдээлэл хийлээ.

Тэрбээр “Манай улс АИ92 бензиний 90%-ийг ОХУ-ын Ангарскийн үйлдвэрээс авдаг. Уг үйлдвэрээс ачигдсан газрын тосны бүтээгдэхүүн хамгийн хурдан буюу 4-5 хоногийн дотор Монголд ирдэг. Бусад үйлдвэрүүдээс ачигдсан бүтээгдэхүүн 21 хоног болон заримдаа нэг сар гаруй болж ирдэг.

Өнөөдрийн байдлаар Ангарскийн үйлдвэрээс 18,000 тонн АИ92 бензин ачигдсан. Зарим нь Монголд ирсэн байна.

Цаашид дизель түлш болон, АИ92 бензиний үнэ нэмэгдэхгүй. Дэлхийн зах зээл дээр нэг баррель нь 70 доллароос доош унасан.

Роснефтээс АИ92 бензинийг нэг тонныг нь 705 доллароор авах таван жилийн хатуу гэрээтэй. Энэ жилийн гэрээгээ сунгасан.

Болж өгвөл иргэд оочер дараалал үүсгэхгүй байхыг хүсэж байна. Бүх хүн машины бакаа дүүргэж авах нөөц байхгүй. Ойрын хоёр, гурав хоногт нөөцийг бүрдүүлнэ. Бензиний нийлүүлэлтийг таслахгүй.

БНХАУ-аас сайн чанарын евро-5 ангиллын 92 бензин 15,000 тонныг захиалсан.

ОХУ-ын Газпром, Нефть хими сервис компаниудаас арай үнэтэй бензин захиалж байна. Импортлогч ААН-үүдэд үнэтэй ч хамаагүй стандарт сайтай бензин авах шахалт үзүүлж байгаа. Улсад шатахууныг нөөцөлдөггүй. Онцгой байдлын журмаар нөөц бий байх, үүнийг Шадар сайд мэднэ.

Шунхлай, Петровис компани хоёр өөр үнэтэй, хоёр өөр стандартын 92 бензин зарж байгаа. Орос, евро стандартын бензинийг 2,300, 3,000-аар зарж байгаа” хэмээн тайлбарлалаа.

Бензин хүлээн авах Гаалийн болон төмөр замын байгууллага амралтын өдрүүдэд ажиллаж байгаа. ОХУ өвлийн дизель түлшийг аравдугаар сарын 15-наас хойш үйлдвэрлэдэг тул манай улс нөөцлөөгүй.

Газрын тосны бүтээгдэхүүн импортлох тусгай зөвшөөрлийг 100 гаруй буюу хангалттай олгосон ч зарим нь ажиллаж чадахгүй байна” гэв

Мөн тэрбээр “ШТС-уудаас жижиг машинууд дизель түлшийг бөөндөж авдаг. Эдгээр машин нь орон нутаг руу тээвэрлэх зөвшөөрөлгүй бол хотоос гаргахгүй. Өөрөөр хэлбэл, ашиг олгох зорилготой бол хязгаарлана. Товчоод дээр үүнд хяналт тавина” гэдгийг онцолсон юм.