Үйлдвэрийн галын эрчийг 05.00 цагийн үед онцгойгийнхон зогсоожээ

-“Говь” компани улсад жилд 10 гаруй тэрбум төгрөгийн татвар төлдөг-

“Говь” ХК-ийн дээвэр шатаж байна гэсэн дуудлагыг Нийслэлийн онцгой байдлын газар 20.45-д хүлээн авчээ. Нийслэлийн гал унтраах бүх ангийнхан ажилласан байна. Одоогоор гал гарсан шалтгаан тодорхойгүй байгаа бөгөөд галыг 05.00 цагийн үед холбогдох албаныхан зогсоожээ.

Тухайн үед галын дуудлагын дагуу Онцгой байдлын байгууллагаас шуурхай арга хэмжээ авч Нийслэлийн Онцгой байдлын газрын бүх Гал түймэр унтраах, аврах анги болох 13 ангийн ээлжийн 140 орчим албан хаагч, гал унтраах шуурхай албаны 30 гаруй автомашиныг дайчлан ажилласан байна. Мөн Ус сувгийн удирдах газар болон хот тохижилтын ус түгээх цистерн автомашинуудыг мөн дайчилжээ. Энэхүү ажиллагааг ОБЕГ-ын тэргүүн дэд дарга, бригадын генерал Г.Ариунбуян, Гал түймэртэй тэмцэх газрын дарга, хурандаа С.Залуухүү нар ахлан ажиллаж байна.

Галын дуудлагын дагуу Онцгой байдлын байгууллагаас шуурхай арга хэмжээ авч Нийслэлийн Онцгой байдлын газрын бүх Гал түймэр унтраах, аврах анги болох 13 ангийн ээлжийн 140 орчим албан хаагч, гал унтраах шуурхай албаны 30 гаруй автомашиныг дайчлан ажиллажээ.

Богино хугацаанд, маш хурднаар тэлсэн галын тархалт, эрчимтэй нэмэгдэж буй шатлагын эрчийг бууруулахын тулд гал сөнөөгчдөд ус их хэмжээгээр шаардагдсан. Иймээс Ус сувгийн удирдах газар болон хот тохижилтын газрын нийт 12 машин галын объекттой хамгийн ойр Моносын худаг, 100 айлын худаг, “Апу” компанийн үйлдвэр болон бусад усны гедратуруудаас тасралтгүй ус зөөж, галын объектод 12 минут тутамд зургаан тонн ус зөөж байсан байна. Гэсэн хэдий ч усны эрэлт их хэвээр байсан учир 03.30 цагийн орчимд Улаанбаатар төмөр зам ТӨХК-ийн гал унтраах алба галт тэргээр 68 тонн усыг ойртуулж, нэмэлтээр тээвэрлэн авчирсан аж. Эндээсээ онцгойгийн болон бусад усны машинууд галын голомт руу ус зөөжээ. Мөн Ус сувгийн удирдах газар болон хот тохижилтын ус түгээх цистерн автомашинуудыг мөн дайчлан ажиллаж ийнхүү галын эрчийг унтрааж чадсан байна.

Манай сурвалжлах багийнхан өглөө 06:30 цагийн үед тус үйлдвэрт очиход замыг нь хааж, дотогш ямар ч хүн нэвтрүүлэхгүй байсан юм. Ямартай ч биднийг ойр орчмоос нь харахад үйлдвэрээс хар саарал утаа олгойдон гарсан хэвээр байв. Тус газар шөнийн болон өглөөний ээлжийн ажилтнууд байсан боловч мэдээлэл өгөх, бичлэг хийлгэхээс татгалзаж байлаа. Мөн галын дүгнэлт эцсийн байдлаар гараагүй тул холбогдох албаныхан тодорхой мэдээлэл өгөх боломжгүй хэмээн тодотгосон.

Ямартай я гал гарах үед үйлдвэрийн барилгын дээврийг тэр чигт нь бүрхсэн байдалтай байжээ. Тиймээс галын тархалтыг зогсооход гал сөнөөгчдөд хүндрэлтэй байсан гэв. Мөн шатамхай материалаар дээврээ зузаалж, барьсан учир галын эрчийг зогсооход хүндрэлтэй байсан гэдгийг холбогдох албанынхан хэлж байлаа.