УИХ-ын гишүүн С.Жавхлан болон “Оффшорчдын эсрэг нэгдсэн хөдөлгөөн”-ийнхөн өнөөдөр Сүхбаатарын талбайд нэлээд дуулиан шуугиантай өнжлөө. Ийнхүү жагсаалд оролцогчдын зарим нь үргэлжлүүлэн суулт зарлахаа мэдэгдээд байна. Энэхүү суулт нь сайн дурынх учраас оффшорчдын эсрэг байр суурьтай хэн бүхэн нэгдэх боломжтойг тус хөдөлгөөний гишүүд иргэдийг урилж байсан юм.
Жагсагчдын гол зорилго нь ирэх даваа гаригт ажил эхлэхэд оффшорт хөрөнгөө нуусан улстөрчдөө эргүүлэн татах, хөрөнгөө оффшорт нуусан хүмүүсийг Монголдоо оруулж ирэх зэрэг шаардлагаа тавин, эрх баригчдыг энэ чиглэлээр эрчимтэй ажиллах шаардлага тавих аж.
Дашрамд дуулгахад, жагсаалын үеэр авто машин импортлогчид авто машинд тогтоосон Онцгой албан татварын үйлчлэлийн хугацааг хойшлуулж өгөх хүсэлт тавихаа илэрхийлж байв.
Өнөөдрийн жагсаалд “Монголын Ахмадын чөлөөт холбоо”-ны тэргүүн Г.Баасан тэргүүтэй ахмадууд үгээ хэлж, өнөөгийн улс төр, эдийн засгийн байдалд бухимдалтай байгаагаа илэрхийлж байв. Тухайлбал, Г.Баасан гурван асуудлыг онцлон “Монгол Улсын байгалийн баялгийг эрх мэдэлтнүүд гадагшаа зөөж, оффшор данс нээсэн байна. Үүнээс болж монгол хүн амьд явах, эрүүл орчинд амьдрах эрхээ алдаж байна. Тийм учраас бид оффшор дансанд байгаа тэр их мөнгийг Монгол Улсад яаралтай татахыг шаардаж байна. Хоёрдугаарт, эргүүлэн татсан мөнгөө юунд зарцуулах тухай ард түмэнтэйгээ ярилцах ёстой. Гуравдугаарт, оффшор данстангуудад хариуцлага тооцох хэрэгтэй. Гэтэл Улсын их хурал оффшорын хууль гээд л хууль гаргаж байна. Энэ хууль гарлаа. Ард түмэн тайван бай гэж тэр оффшорт байгаа мөнгөө залилах гэсэн арга хэмжээг л авч байна.Өнөөдрийн оффшорын жагсаалын гол зорилго бол дэлхий дахинд баригдаад буй С.Баярыг эргүүлэн татах ёстой. Мөн саяхан баталсан оффшорын хууль гэсэн худлаа хуулиа хүчингүй болгох ёстой” хэмээн хэлсэн юм.
Мөн жагсаалд оролцогчдод хандан УИХ-ын гишүүн С.Жавхлан үг хэллээ. Тэрбээр “Ардчилсан нам С.Баярцогтоос мөнгөө олж ир, МАН С.Баяраас мөнгөө олж ир. Мөн оффшорт нэр холбогдсон 49 нөхрийн нэрс байгаа. Тэд ч мөн хөрөнгөө оруулж ирэх ёстой. Бүгд гадаад дахь мөнгөө олж ирж, тэрний дараа Ерөнхийлөгчийн сонгууль хийе. Татвар төлөгч хэчнээн хүн байна, татвараа төлөхгүй шүү. Ерөнхийлөгчийн сонгуульд зориулсан хуулиуд хойшоо тавигдсан. Чихэн дээр цэцэг ургуулдаг байсан бол одоо бүр шарилж ч ургахаа байлаа. Бурхан халдун хайрхан дээрээ өргөсөн тангаргаа та нартаа сонордуулъя. Зарим нь сонссон байх зарим нь сонсоогүй байх. Монголын төрийн сэнтийд сууж баялгийг цөлмөж, хүний сэтгэл гаргачихаад олсноо гадаадад нууж байгаа хэсэг луйварчид, тэднийг хамгаалж байгаа бүлэглэлтэй тэмцье, монголчууд аа.
Монгол Улсыг алтыг нь аваад хаяж болдог юм шиг үзэж байгаа дарга нартай тэмцье.
Миний бие нам бүлэглэл аль нэг хөдөлгөөнд нэгдсэн зүйл байхгүй. Яагаад гэвэл Монгол төрийн түшээ, хэн нэгний утсан хүүхэлдэй болсон гэж битгий бодоорой. Хариуцлагатай албан тушаалд очсон учраас Жавхлан Жавхландаа л үнэнч байна.
Монгол төр сэтгэл буруу хүмүүсийн гарт орж, хэсэг бүлэг хүмүүсийг хаацайлах боллоо.
УИХ-д сууж байгаа, хилийн чанадад хөрөнгөтэй хүмүүсээ нам нь санаачилга гарган эгүүлэх татуулах намын гишүүдийнхээ гадаад дахь хөрөнгийг Ерөнхийлөгчийн сонгуульд нэр дэвшигчдээ тодруулахаасаа өмнө гаргаж ир.
Эрх баригчид татварын асуудлаар олон түмнээсээ уучлал гуй.
Ерөнхийлөгч та УИХ-ын зүгээс гаргаж байгаа алдаатай бодлого дээр хориг тавиач ээ. Ирэх долоо хоногт хориг тавихгүй бол алдаатай бодлогыг дэмжсэнд тооцно.
Монголоор маань тэд 27 жил тоглолоо. Одоо болсон.
Бид өөрчлөгдөх шаардлагагүй, тэд өөрчлөгдөх ёстой. Энд 200 хан гэр бүл бий. Тэднийг өөрчлөгдтөл бид тэмцэх ёстой” гэлээ.
Ийнхүү тус жагсаал маргааш суултаар үргэлжлэх болсоныг тус хөдөлгөөний тэргүүнүүд албан ёсоор мэдэгдлээ.
О.Соёмбо
