Зөвлөгөөнийг нээж, нийслэлийн Засаг дарга буюу Улаанбаатар хотын захирагч Д.Сумъяабазар үг хэллээ. Тэрбээр “Тэрбум мод” үндэсний хөдөлгөөний хүрээнд нийслэлд нийт 120 сая мод тарина. 10 жилийн дотор тэрбумаар тоологдох мод тарих, ногоон хот болох энэхүү санаачилгад иргэн бүрийн оролцоо чухал гэдгийг хотын дарга онцлоод, нийслэл хотод шинээр баригдахаар төлөвлөгдөж буй томоохон бүтээн байгуулалтыг “Тэрбум мод” санаачилгатай уялдуулах бодлогыг барьж ажиллана гэв. Мөн “Тэрбум мод” үндэсний хөдөлгөөнийг хэрэгжүүлэхтэй холбогдуулан иргэд, аж ахуй нэгжийг урамшуулах хэлбэрийг урьдчилсан байдлаар танилцуулахад бэлэн болоод байгаа тухай нээлтийн арга хэмжээний үеэр дурдав.

Түүнчлэн энэ үеэр Ногоон хот-Иргэдийн оролцоо зөвлөгөөнд Монгол Улсын Ерөнхийлөгчийн Тамгын газрын дарга Я.Содбаатар мэндчилгээ дэвшүүлэв. “Тэрбум мод” үндэсний хөдөлгөөнийг амжилттай өрнүүлэхийн тулд ойн салбарыг эдийн засгийн эргэлтэд оруулан ажлын байрыг бий болгох, ДНБ-ний нэг хувийг Байгаль орчны салбарт зарцуулах санаачилга хэрэгжихээр бэлтгэгдэж буйг хэллээ. Өмнө нь ДНБ-ний нэг хувийг эрүүл мэнд, нийгмийн салбарт түлхүү зарцуулж ирсэн гэв.

Харин БОАЖ-ын сайд Б.Бат-Эрдэнэ хэлсэн үгэндээ “Монгол Улсын нийт газар нутгийн 76,9 хувь нь газрын доройтолд орж, усны нөөц, хөрсний бохирдлын асуудал маш их хөндөгдөж байна. Нийслэлийн хувьд, ялангуяа өнөөдрийн “Ногоон хот- Иргэдийн оролцоо зөвлөгөө”-нөөс тодорхой шийдвэрүүд гарч, нийслэлийн 9 дүүрэгт цэцэрлэгт хүрээлэн байгуулах ёстой гэж харж байна. Мөн Үндэсний соёл, амралтын хүрээлэнгийн ашиглагдаагүй газрыг хотын дарга чөлөөлсөн. Энэ газрыг иргэд, БОАЖЯ ногоон байгууламжаар үлдээж өгөхийг хүсэж байна. Иргэдэд цементэн талбай бус ногоон зүлэг, байгууламж хамгийн их үгүйлэгдэж байна. Тэр утгаараа игэдийн ая тухтай амьдрах орчныг бий болгоход Монгол Улсын Ерөнхийлөгчийн санаачилга “Тэр бум мод” үндэсний хөдөлгөөний ач холбогдол оршиж байна” гэлээ.

Түүнчлэн “Тэрбум мод” үндэсний хөдөлгөөнөөр дамжуулан эдийн засгийн томоохон эргэлтийг бий болгох, олон улсын тавцанд дэлхийн дулаарал, уур амьсгалын өөрчлөлт, цөлжилт, усны нөөц хомсдлын асуудлыг Азийн улс орнуудын түвшинд, олон улсын байгууллагуудтай хамтран ажиллаж байж хамтын хүчээр үр дүнд хүрэх ёстой гэдгийг онцлов. Мөн БОАЖЯ, Нийслэл хоттой газрын давхцалтай, асуудал дагуулсан газрууд олон байна. Үүнийг шийдвэрлэж, нэг талд гарна гэдэгт итгэлтэй байна гээд, хот төлөвлөлтийн тал дээр дэмжиж ажиллахаа илэрхийлэв. Түүнээс гадна хотжилт, барилгажилт явагдах ёстой. Гэхдээ нөгөө талдаа байгаль орчинг хайрлан хамгаалах, дэмжих, сэргээх, ногоон хөгжлийг дэмжих бодлого явагдах ёстой. Энэ бодлого нэг цонх, нэг ойлголтоор харж, тодорхой үр дүнд хүрнэ гэдгийг онцлов.