Маргааш нийслэлийн бүх сургууль, цэцэрлэг 10.00-19.00 цагийн хооронд ажиллана

Ажлын цагийг 10:00-19:00 цаг болгосон захирамжийг баримтлах чиглэлийг нийслэлийн бүх ЕБС, цэцэрлэгт хүргүүлжээ

“Гамшгаас хамгаалах иж бүрэн сургууль” нийслэлийн хэмжээнд дөрөвдүгээр сарын 24-26-нд зохион байгуулагдаж байна. Үүнтэй холбогдуулан Нийслэлийн Засаг дарга бөгөөд Улаанбаатар хотын Захирагчийн 2019 оны дөрөвдүгээр сарын 19-нд гаргасан “Ажлын цагийн хуваарьт зохицуулалт хийх тухай “ А/339 дүгээр захирамжийн хэрэгжилтийг ханган ажиллах үүрэг чиглэлийг албан ёсоор нийслэлийн ерөнхий боловсролын сургууль болон цэцэрлэгийн удирдлагуудад хүргүүлжээ.

Уг захирамжийн хэрэгжилтийг хангах ажлын хүрээнд нийслэлийн төр захиргаа болон аж ахуйн нэгж байгууллагуудын 2019 оны дөрөвдүгээр сарын 25-ны өдрийн ажил эхлэх цагийг 10:00 цаг, дуусах цагийг 19:00 цаг хэмээн тогтоосон шийдвэрийн хэрэгжилтийг мөрдлөг болгон ажиллах юм.

Харин сүүлийн өдрүүдэд зарим хэвлэл мэдээллийн хэрэгсэл, цахим хуудсаар 2019 оны дөрөвдүгээр сарын 25-ны өдөр нийслэлийн хэмжээнд боловсролын байгууллагуудад хичээл сургалтын үйл ажиллагаа явуулахгүй хэмээсэн нь ташаа мэдээлэл гэдгийг нийслэлийн Боловсролын газраас мэдээллээ.