Бэлгийн замаар дамжих халдвар авсан бол яах вэ?

Ихэвчлэн бэлгийн замаар дамжин халдварладаг өвчнүүдийг бэлгийн замаар дамжих халдвар (БЗДХ) гэнэ. Тухайлбал, заг хүйтэн, трихомониаз, тэмбүү, хламид, ДОХ зэрэг 20 гаруй энэ төрлийн өвчин бүртгэгдсэн байдаг.

БЗДХ-ын үед ямар шинж тэмдэг илрэх вэ?

Бэлгийн замаар дамжих халдвар авсан үед дараах шинж тэмдгүүд илэрч болно.

Үүнд:
• Шодой болон үтрээнээс хэвийн бус ялгадас гарах
• Шодой, үтрээ эсвэл шулуун гэдэсний орчим яр, шарх, цэврүү гарах
• Шээх үед шээсний сүвээр хорсож өвдөх
• Хэвлийн доод хэсгээр эсвэл бэлгийн хавьтлын үед өвдөлт мэдрэгдэх
• Бэлэг эрхтний орчмоор загатнах

АНХААР!!! Өвчний шинж тэмдэг зарим хүнд огт илрэхгүй байж болно.

БЗДХ тархах замууд:
• Халдвартай хүнтэй хамгаалалтгүй бэлгийн хавьталд орсноор
• Халдварлагдсан цус цусан бүтээгдэхүүн хэрэглэснээр
• Халдвартай эхээс урагт
• Халдварлагдсан зүү тариур, сахлын хутга зэргийг хэрэглэх

АНХААР!!! Мэргэжлийн эмчийн зааваргүйгээр ямар ч эм тариаг дур мэдэн хэрэглэж болохгүй. Түүнчлэн Та өөрийгөө халдвар авсан байж магадгүй гэж бодож байвал өвчний шинж тэмдэг илрээгүй ч байсан цаг алдалгүй эмчид хандаарай.