УИХ-ын Өргөдлийн байнгын хорооны хуралдаанаар өнөөдөр /2020.04.15/ Монголбанкнаас гаргасан хэрэглээний зээлийн эргэн төлөлтийн хугацааг хойшлуулах шийдвэр хэрэгжихгүй байгаа талаар ирүүлсэн өргөдлийн дагуу Монголбанкны мэдээлэл сонсож байна.
Тус мэдээллийн талаар МОНГОЛБАНКНЫ НӨӨЦИЙН УДИРДЛАГА, САНХҮҮГИЙН ЗАХ ЗЭЭЛИЙН ГАЗРЫН ЗАХИРАЛ А.ЭНХЖИН дараах тайлбарыг өглөө.
Тэрбээр “Өнөөдрийн байдлаар ипотекийн зээлийн нийт үлдэгдэл 4.6 их наяд төгрөг, нийт 97 мянган зээлдэгч хамаарагдана. Төрөөс хэрэгжүүлж буй 8 болон таван хувийн хүүтэй ипотекийн зээлийн хөтөлбөрт 3.4 их наядын үлдэгдэл, 72 мянган зээлдэгч байна. Монголбанкнаас дөрвөн сарын 03-ны өдөр ипотекийн 8 болон 5 хувийн зээлийн үндсэн зээл болон зээлийн хүүгийн төлбөрийг гурван сараар хойшлуулах шийдвэр гаргасан. Дээрх өдрөөс хойш уг шийдвэрийг хэрэгжүүлэхээр арилжааны банкууд болон МИК-тай хэд хэдэн удаа уулзалдаж ойр ажиллалаа.
Иргэдийн хувьд зээл хойшлуулах хүсэлтээ тавдугаар сарын 01-ныг хүртэл гаргана. Банкуудын хувьд зөвхөн хүсэлтэд үндэслэн ямар нэгэн нотолгоо баримт шаардахгүйгээр зээлийн гэрээний эргэн төлөлтийн хуваарьт нь өөрчлөлт оруулна. Нэг сарын төлөлтийн дүн дээр нь ямар ч өөрчлөлт оруулахгүйгээр гурван сараар хугацааг нь сунгах арга хэмжээг хэрэгжүүлж байсан. УИХ-аас байгуулагдсан ажлын хэсэг дээр энэ арга хэмжээг Засгийн газраас хэрэгжүүлж буй бусад арга хэмжээтэй уялдуулах нь зөв гэж үзэн ипотекийн зээл төлөлтийн хугацааг зургаан сар болгосон. Уг шийдвэр хараахан хэрэгжиж эхлээгүй байгаа учраас бид банкуудад чиглэл өгч байна. Чиглэлд зээл төлөлтөө хойшлуулах иргэдийн хүсэлтийг хүлээж авч бай, арга хэмжээ нь тодорхой болсон тохиолдолд зээлийн гэрээнд нь өөрчлөлт оруулаарай гэсэн чиглэлийг банкуудад өгсөн. Тиймээс банкууд иргэдээс ямар нэгэн нотолгоо баримт шаардахгүй, зээлийн эргэн төлөлтийн хугацаа нь зургаан сараар сунгагдана. Энэ хугацаанд үлдэгдэл зээл, үндсэн төлбөрт хүү хуримтлуулахгүй байхаар шийдвэрлэсэн.
Монголын Ипотекийн Корпорацийн тухайд өмнө нь Монгол Улсын хэмжээнд орон сууцны зээлийг үнэт цаасжуулах эрхтэй ганцхан байгууллага нь байсан. Одоо Монголбанкнаас ипотекийн хөтөлбөрийн санхүүжилийг буцааж олгох талаар яригдаж байгаа. Энэ нь хэрэгжвэл үнэт цаасжуулалтын зах зээлд өрсөлдөөн бий болгох НОСК, ТОСК зэрэг байгууллагуудад эрхийг нь өгөх чиглэлтэй ажиллаж байна” гэсэн юм.
