НИТХ-ын дарга хэн болох вэ

Маргааш Нийслэлийн ИТХ болно. Эл хурлаар Ц.Сандуй албан ёсоор чөлөөлөгдөх юм.
Ингэснээр түүний оронд хэн очих вэ гэх асуулт улс төрийн хүрээнийхний дунд тархаад байна. Одоогоор Нийслэлийн ИТХ-ын гишүүн Ж.Батбаясгалан, Д.Баярсайхан, Г.Төмөрбаатар нарын нэр яригдаж байна. Уг нь ИТХ-ын гишүүн С.Амарсайханы нэр яригдаж байсан ч эл эрхэм нэрээ татсан гэх мэдээлэл байгаа юм. Иймээс МАН-ын Удирдах зөвлөл дээрх гурван эрхмээс нэгийг нь сонгох бололтой.

Г.Төмөрбаатарын тухайд ОХУ-ын Симьферополь хотын цэргийн их сургууль, МУИС-ийн Эдийн засгийн сургууль, Удирдлагын академи, БНСУ-ын Логодо академийг дүүргэсэн нэгэн аж. Эдийн засагч, автын инженер мэргэжилтэй.

Д.Баярсайханы хувьд Дархан политехникийн сургууль, МУИС, Удирдлагын академи дүүргэсэн. Эдийн засагч мэргэжилтэй.

Ж.Батбаясгалан нь “Түшээ” дээд сургууль, МУИС-ийн Хууль зүйн сургуулийг төгссөн, эрхзүйч мэргэжилтэй ажээ.

Дашрамд дуулгахад, НИТХ 45 төлөөлөгчтэй. Үүнээс 33 нь МАН-ын төлөөлөгч билээ.