ОБЕГ: Монголын аврах багийн эмнэлгийн бүлэг яаралтай тусламж үзүүлж, мөрч ноход эрэн хайх ажиллагаа хийж байна

Монгол Улсын эрэн хайх, аврах баг гамшгийн голомт болох Хатай хотод Улаанбаатарын цагаар 22:00 цаг (Анкарагийн цагаар 17:00)-т очсон билээ.

БНТУ-д очсон манай улсын эрэн хайх, аврах багийн үйл ажиллагаа үргэлжилж байна.

Өнөөдөр эрэн хайх, аврах багийн эмнэлгийн бүлэг яаралтай тусламж үзүүлэх эмнэлэг дэлгэн ажиллаж байгаа бол мөрч ноход нуранги доор эрэн хайх ажиллагаа явуулж байгаа аж.

Мөн өнөөдөр Улаанбаатарын цагаар 14:16 цаг (Анкарагийн цагаар 09:16)-т Монгол Улсаас БНТУ-д суугаа ЭСЯ-ны Батлан хамгаалахын атташе хошууч генерал Ж.Бадамбазар Монгол Улсаас очсон багийн үйл ажиллагаатай танилцжээ.

Түүнчлэн аврах багийн ахлагч, бригадын генерал Б.Ууганбаяр Хатай хотын хээрийн эрүүл мэндийн төвийн даргатай уулзаж, харилцан ажиллагааны талаар санал солилцсон болохыг Онцгой байдлын ерөнхий газраас мэдээллээ.