Хүүхдийн хөгжил, хамгааллын асуудлаар Нийтийн сонсгол хийх хүсэлт өргөн барив

Хэвлэлийн бага хурал

УИХ-ын Төсвийн зарлагын хяналтын дэд хорооны дарга З.Нарантуяүүд өнөөдөр мэдээлэл хийв. Тодруулбал, Хүүхдийн хөгжил, хамгааллын төсвийн хяналтын асуудлаар Нийтийн сонсгол зохион байгуулах хүсэлтийг УИХ-ын даргад өргөн барьсан ажээ. Энэ талаарх мэдээллийг эдгээр гишүүн тодруулж, ирэх оны төсвийн төсөлд хүүхэд хамгаалалд зарцуулах 6.5 тэрбум төгрөгийг 2.3 тэрбум болгож бууруулсан болохыг мэдэгдэв. Тиймээс хүүхэд хамгааллын чиглэлд зарцуулж буй төсөв, түүний үр дүн, цаашид хэрэгжүүлэх арга хэмжээний талаар Нийтийн сонсгол зохион байгуулах хүсэлт хүргүүлж байгаагаа З.Нарантуяа гишүүн дурьдлаа.

Тэрбээр “2017 онд хүүхэд харах үйлчилгээнд 6.6 тэрбум төгрөг, 2018 онд 5.5 тэрбум төгрөг зарцуулсан. Төсөв хасагдсанаас үүдэн хүүхэд харах үйлчилгээнд хамрагдсан хүүхдийн тоо 500-гаар буурсан. Үүний 153 нь хөгжлийн бэрхшээлтэй хүүхэд байна. Ирэх оны төсвийг анх удаа 11 их наяд төгрөг давсан зарлагатай боловсруулсан боловч хүүхэд хамгаалалд зарцуулах мөнгийг 66 хувиар бууруулсныг бид эсэргүүцэж байгаа юм” гэлээ.

Мөн Д.Оюунхорол гишүүн  “Ирэх оны төсвийн төслийг хэлэлцүүлэгт бэлтгэх ажлын хэсэг ажиллаж байгаа. Төсвийн төсөлд яамдын үйл ажиллагааны зардлыг маш их танасан байна. Ирэх оны төсвийн зардлын дийлэнх хэсгийг сургууль, цэцэрлэг, эмнэлгийн барилга шинээр барих, өргөтгөх хөрөнгө эзэлж байгаа юм. Зарчмын хувьд энэхүү хөрөнгө оруулалтыг бид дэмжиж байгаа. Гэхдээ хүүхэд харах үйлчилгээг орхигдуулж болохгүй” хэмээв.