Нийслэлд 1960 оноос өмнө баригдсан 160 барилга байна

2017-05-1 Нийслэл

Нийслэлийн Газар хөдлөлтийн гамшгийн аюулаас урьдчилан сэргийлэх байнгын ажиллагаатай салбар зөвлөлийн хуралдаан өнөөдөр боллоо.

Хуралдаанаар байнгын ажиллагаатай зөвлөлийн гишүүд 2017 оны 01 дүгээр улирлын хийсэн ажлын тайлан, барилгын чанар аюулгүй байдлын үнэлгээ, паспортжуулалтын ажлын үйл явц, “Гамшигт тэсвэртэй Улаанбаатар” төслийн танилцуулга, гишүүдийг холбоо зарлан мэдээллээр хангах, мэдээллийн харилцан ажиллагааны талаарх мэдээллийг хийж санал солилцлоо.

Мөн Улаанбаатар хотын газар хөдлөлтийн гамшгаас урьдчилан сэргийлэх чадавхийг дээшлүүлэх  чиглэлээр авч хэрэгжүүлж байгаа арга хэмжээний талаар хэлэлцсэн юм.

Нийслэлийн барилга төлөвлөлт, ерөнхий төлөвлөгөөний газраас хийсэн мэдээлэлд “Нийслэлийн хэмжээнд нийтийн зориулалттай орон сууц 1960 оноос өмнө баригдсан 160, 1961-1973 онд 98, 1974-1987 онд 420, 1988-2000 онд 158, 2001-2016 онд 2962 буюу нийт 3798 барилга баригдсан байна.

Монгол Улсын Шадар сайдын 2017 оны 02 тоот тушаалаар “Газар хөдлөлтөд тэсвэртэй, аюулгүй орчин бий болгох” үндэсний хөдөлгөөн зохион байгуулах ажлын хэсгээс ирүүлсэн төлөвлөгөөний дагуу үнэлгээ хийх сургууль цэцэрлэг, эмнэлгийн  барилга байгууламжийн зураг төсөл, техникийн бичиг баримт, мэдээллийн судалгааг нэгтгэж түүнд үндэслэн нэн түрүүнд дүгнэлт гаргаж паспортжуулах100 барилга байгууламжийн хэмжилт хийх хуваарийг гарган ажлыг эхлүүлэхэд бэлэн болсон.

Мөн гамшгийн үед иргэдийг нүүлгэн шилжүүлэх, түр байршуулах хоргодох байрны зориулалтаар ашиглахаар төлөвлөсөн барилга байгууламжийг судалж ашиглалтад орсон он, хийц, бүтээц, хүчин чадал зэрэг үзүүлэлтээр ангилж эхний ээлжинд паспортжуулах шаардлагатай 20 барилгад биет үзлэг хэмжилт судалгаа хийх ажлыг эхлэхэд бэлэн болсон гэдгийг онцолсон юм.

Хуралдааны үеэр байнгын ажиллагаатай зөвлөлийн дарга П.Баярхүү холбогдох байгууллагуудад  ажлыг эрчимжүүлэх, дараагийн хурлаар хэлэлцэх зарим асуудлын талаар үүрэг чиглэл өглөө гэж нийслэлийн Онцгой байдлын газраас мэдээллээ.

© 2017 newsmedia.mn. Бүх эрх хуулиар хамгаалагдсан.