Коронавируст халдвар/КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд барьцаалан зээлдүүлэх үйлчилгээний сарын хүүг 3%, алдагдлыг 0.2%-аас хэтрэхгүй байхаар заасан.

Энэхүү шийдвэр нь тус бизнес эрхлэгчдийг алдагдалд оруулж байгаа тул хүчингүй болгохыг шаардан Барьцаалан зээлдүүлэх бизнес эрхлэгчдийн холбооноос өнөөдөр мэдээлэл хийлээ. 

Барьцаалан зээлдүүлэх бизнес эрхлэгчдийн холбооны тэргүүн “Ломбард нь санхүүгийн зах зээлд үйл ажиллагаа явуулдаг хамгийн бичил бизнес эрхлэгч юм. Үйлчлүүлэгчдийн авч буй зээлийн дундаж хэмжээ нь 80,000 төгрөг. Иргэд хүүхдэддээ эм авах, банкны зээлийн хүүгээ төлөх гэх мэтээр бичил зээл авдаг.

Бид Шударга өрсөлдөөн, хэрэглэгчийн төлөө газар, Монгол Улсын Засаг газар болон Ерөнхий сайд Л.Оюун-Эрдэнэд шаардах бичиг хүргүүлж байна” гэлээ.

Тус шаардлагад,

-Үндсэн хуулийн 19.2 заалтыг зөрчсөн тул Үндсэн хуулийн цэцэд хандаж тус хуулийг хүчингүй болгуулах. Учир нь онц болон дайны байдал зарлаагүй нөхцөлд хүний эрх зөрчсөн, компаниудын үйл ажиллагааг алдагдуулсан хуулийг цар тахлын үед авах онцгой нөхцөл байдал гэдэг шалтгаанаар баталсныг эсэргүүцэж байна.

-Өрсөлдөөний тухай хуулийн холбогдох заалтууд зөрчиж байна. Шударга өрсөлдөөн хэрэглэгчийн төлөө газар/ШӨХТГ/ын үндсэн чиг үүргийнх нь эсрэг үйл ажиллагаа явуулах үүрэг даалгаврыг УИХ-аас өгсөн. Учир нь ШӨХТГ нь аж ахуйн нэгжийн эрхийг хамгаалах ёстой байгууллага атал дээрх хуулийн хэрэгжилтийн хянах, биелүүлээгүй тохиолдолд торгох, шийтгэх байгууллага болоод байна. Иймд хуулиар хүлээсэн өөрийн үүргээ биелүүлж ажиллах боломжийг олгохыг шаардаж байна.

-Иргэний хуулийн дагуу зээлдэгчийн эрх ашгийг хамгаалж, хүүг багасгах ёстой атал уг хуулийн зүйл заалтыг үгүйсгэсэн хууль баталсан тул хэрэгжих боломжгүйг бодолцон Иргэний хуульд нийцүүлэн арга хэмжээ авах

-Энэхүү хуулиас болж алдагдалд орсон, үйл ажиллагаа нь хаагдсан барьцаалан зээлдүүлэх газруудад нөхөн олговор олгох

-Төр аж ахуйн нэгжүүдийнхээ зөрчигдсөн эрхийг сэргээх, иргэдийнхээ өмнө хүлээсэн үүргээ биелүүлэх шаардлагыг тавьж байна.

Мөн тэрбээр “Ломбард нь Монгол Улсын бүх хууль тогтоомжид нийцсэн үйл ажиллагаа явуулдаг. Санхүүгийн зах зээлийн нэг хувьд ажилладаг тоо бий. Ломбард хаагдсанаар хар зах зээл, далд эдийн засаг нэмэгдэж, хулгайлах гэмт хэрэг өсдөг тоо баримт байдаг бөгөөд үүнийг шийдэх гарц нь ломбард байдгийг олон улсад судлан гаргасан бөгөөд хууль эрх зүйн орчныг нь сайжруулан, стандартыг тогтоон ажиллуулдаг” гэв.

Дашрамд дуулгахад, зах зээлд 1,000 гаруй ломбард үйл ажиллагаа явуулж байсан бол зардлаа нөхөх боломжгүй болсноор 20 хувь буюу 200 гаруй нь хаагджээ.