Монголын хөгжмийн урлагийн амьд домог “Харанга” хамтлагийн 30 жилийн ой энэ жил тохиож буй. Хамтлагийнхан энэ ойгоо нижгэр тэмдэглэхээр болжээ. Ойд зориулсан олон үйл ажиллагаа болох юм байна. Тухайлбал, үүсэн байгуулагдсан цагаасаа эхлэн бүрэн бүрэлдэхүүнээрээ 30 жил уран бүтээл туурвиж байгаа гэдэг утгаараа дэлхийд ховорт тооцогдох тус хамтлагийн түүхийг өгүүлсэн баримтат, реалити нэвтрүүлэг хүргэхээс гадна “Volume-1” пянз гаргахаар зэхэж байгаа аж. Түүнчлэн 1997 онд гаргасан “Эрин зууны хөг”, “Best of Haranga”, 2000 онд гаргасан “Бодлын тэнгис”, 2003 онд гаргасан “Ертөнцийн өнгө” цомгоо дахин хэвлүүлэхээр болжээ.
Мөн ойд зориулсан хийж буй томоохон ажлын нэг нь “Замд гаръя” тоглолт юм. Тус тоглолт аравдугаар сарын 19-нд 15.00 цагт “Буянт-Ухаа” ордонд болох аж. Тоглолтод Монголын орчин үеийн хөгжмийн шилдэг хамтлаг, дуучид оролцох юм байна. Тухайлбал, “Хурд”, “Нисванис”, “Madness”, “Fire”, “The limons”, “A sound”, “Rec on”, Гавьяат жүжигчин Д.Жаргалсайхан, Т.Ариунаа, Б.Сарантуяа, “Никитон” хамтлагийн дуусичн Б.Батчулуун, гитарчин Д.Өлзий-Орших, дуучин С.Наран, Б.Чойжоо, альтернатив Х.Отгончимэг, “Киви”-гийн Д.Уламбаяр нар оролцох ажээ.
Тоглолтын тасалбарыг www.ticket.mn- ээр борлуулах бөгөөд тоглолтын өдөр тусгай автобус хотын төвөөс “Буянт-Ухаа” хүртэл явах юм байна. Мөн тоглолтын үеэр хамтлагийн түүхийг өгүүлэх зургийн үзэсгэлэн гарах юм байна.
