Энэ наадмын нэгэн тод өнгө Дархан аваргын эргэн ирэлт байх болно

“Аваргууд дэвжээнээс холддоггүй. Тэд цаг хугацаатай барилддаг” гэж өвгөдийн хууч бий. Үндэсний их баяр наадмын дэвжээ энэ жил нэгэн онцгой мөчийн гэрч болох гэж байна. Монгол Улсын Хөдөлмөрийн баатар, Монгол Улсын Гавьяат тамирчин, Дархан аварга Гэлэгжамцын Өсөхбаяр энэ жилийн улсын их баяр наадамд дахин зодоглохоор болжээ. Түүний энэ шийдвэр бөх сонирхогчдын анхаарлыг хамгийн их татаж, энэ удаагийн наадмын нэгэн тод өнгө байх болов уу…

Г.Өсөхбаяр бол зөвхөн үндэсний бөхийн аварга төдийгүй Монголын спортын түүхэнд нэрээ мөнхөлсөн хосгүй тамирчин юм. Тэрбээр 1995 онд улсын заан цол хүртсэнээс хойш улсын наадамд олон жил тогтвортой хүч үзэж, 2002, 2003, 2005, 2009 онуудад дөрвөн удаа түрүүлэн үндэсний бөхийн дээд оргилд хүрсэн. Улсын наадамд нийт 14 удаа шөвгөрч, 2010 онд үзүүрлэсэн нь түүний ур чадвар, тогтвортой амжилтыг илтгэнэ. 2014 онд Үндэсний их баяр наадмын тухай хуульд орсон өөрчлөлтийн дагуу түүнд Дархан аварга цол олгосон юм.

Түүний амжилт зөвхөн үндэсний бөхөөр хязгаарлагдахгүй. Чөлөөт бөхөөр Азийн аварга болж, Азийн наадмын хүрэл медаль хүртсэн, мөн сонирхогчдын сүмогийн дэлхийн аварга шалгаруулах тэмцээнд хоёр удаа түрүүлсэн нь Монголын спортын түүхэнд цөөн тохиох олон талт амжилтын нэг билээ. Иймээс түүнд Монгол Улсын Гавьяат тамирчин, Хөдөлмөрийн баатар цол хүртээсэн нь түүний хөдөлмөр, гавьяаны бодит үнэлгээ болсон юм.

Өдгөө 52 настай Дархан аварга дахин улсын наадмын дэвжээнд гарах гэж буй нь зөвхөн ялалт, давааны төлөөх өрсөлдөөн бус, үндэсний бөхийн үнэт өв, үе үеийн аваргуудын манлайлал, тэсвэр хатуужлын бэлгэдэл болж байна. Залуу бөхчүүдийн хувьд, түүний эсрэг барилдана гэдэг өөрөө нэр төрийн хэрэг бол үзэгчдийн тухайд, аваргын барилдааныг дахин харах боломж юм.

Наадам бүр өөрийн гэсэн өнгөтэй байдаг. Харин энэ жилийн наадмын хамгийн тод өнгө нь яах аргагүй Дархан аварга Г.Өсөхбаярын эргэн ирэлт. Энэ бол зөвхөн нэг аваргын барилдаан бус. Энэ бол Монгол бөхийн бахархал, үе үеийн аваргуудын залгамж холбоо, үндэсний өв соёлын үнэ цэнийг дахин сануулах онцгой агшин байх болов уу.