Баян-Өлгий аймагт нэг иргэнийг тусгаарлажээ

Казахстанаас Баян-Өлгий аймагт өчигдөр ирсэн нэг иргэн халуурч коронавирусийн сэжигтэй шинж тэмдэг илэрсэн учраас тухайн иргэнийг тусгаарлажээ. Тиймээс тус аймгаас гарах хөдөлгөөнийг Зам тээврийн хуулийн 14.1.2 т заасны дагуу тус аймгийн Засаг даргын захирамжаар хаалаа. Харин орох хөдөлгөөн нээлттэй юм байна.

Эрүүл мэндийн яамны Эмнэлгийн тусламжийн газрын дарга Я.Буянжаргал өнөөдөр мэдээлэл  хийх үеэрээ “Баян-Өлгий аймгийн Цагааннуур дахь хилийн боомтоор энэ сарын 13-14-нд шилжих шөнө орж ирсэн иргэдийг тусгаарласан. Нэг иргэн халуурч хоолой нь өвдсөн гэсэн зовиртой байсан ч Цагааннуур сумаас аймгийн төв рүү явах замдаа машин нь эвдэрч их даарсан гэсэн өгүүлэмжтэй иргэнийг аймгийн нэгдсэн эмнэлэгт тусгаарласан бусад иргэд сургуулийн дотуур байр болон МСҮТ-ийн байруудад байгаа” гэж мэдээлсэн.

Дашрамд дуулгахад, Казахстан улсад коронавирусийн халдвар бүртгэгдсэнтэй холбогдуулан Улсын Онцгой комисс Баян-Өлгий аймгийн Онцгой комиссын гишүүдтэй цахим хурал хийж, өчигдрөөс эхлэн Цагааннуурын боомтоор нэвтэрсэн Монгол Улсын иргэдийг 14 хоног тусгаарлаж, гадаадын иргэдийг огт нэвтрүүлэхгүй байхыг үүрэг болгосон юм.