Арван жилийн өмнө зогссон цаг газар хөдөлсний дараа ажиллаж эхэлжээ

2021-04-16 Ертөнц

2011 оны гуравдугаар сард Фүкүшимад болсон газар хөдлөлтийн үеэр нутгийн Бүддийн шашны сүмд байсан 100 жилийн настай цаг эвдэрч, зогссон юм байна. Харин уг гамшгаас 10 жилийн дараа мөн газар хөдөлсний дараа уг цаг өөрөө ажиллаж эхэлжээ.


Сүмийн хамба лам Буншун Сакано газар хөдлөлтийн дараа сүмийн нурангин дороос гаргасан цагаа ажиллуулах гэж оролдоод чадаагүй гэнэ. Энэ оны хоёрдугаар сарын 13-ны өдөр бага хэмжээний газар хөдөлсний дараа уг цаг өөрөө ажиллаж эхэлсэн бөгөөд хоёр сар тасралтгүй ажиллаж байгааг Сакано ярьжээ.

80 см диаметртэй Сэйко компанийн үйлдвэрлэсэн ханын цаг 100 жилийн настай бөгөөд 2011 оны гамшгаас хэдэн жилийн өмнө Сакано лам Фүкүшимагийн эртний эдлэлийн дэлгүүрээс худалдаж авч байжээ.

Сэйко компанийн төлөөлөгч чичиргээний улмаас цагны эд ангиудад тогтсон тоос унаж, гацаа арилсан нь ажиллаж эхлэхэд нөлөөлсөн байж магадгүй гэж тайлбарлажээ.

© 2017 newsmedia.mn. Бүх эрх хуулиар хамгаалагдсан.