Сүхбаатар дүүргийн 20 дугаар хороо, Хадатын аманд шар өвс шатаж байна гэх дуудлага өнөөдөр 15:00 цагт иржээ. Дуудлагын дагуу гал түймэр унтраах, аврах 34 дүгээр ангийн бэлтгэл ээлжийн бүрэлдэхүүн очсон байна. Тус бүрэлдэхүүнийг очиход хөрсний шар өвс шатаж мод руугаа тархсан байжээ. Ийнхүү нэмэлтээр аврах анги, гал түймэр унтраах, аврах 10, 34, 74 дүгээр ангиас нийт 34 алба хаагч, найман автомашинтай, ногоон бүсийн хөдөлгөөнт эргүүлийн дөрвөн алба хаагч нэг автомашинтай гал түймрийг унтраахаар ажиллаж байгаа аж.
Хаврын улиралд хуурайшилт, салхи шуурга ихсэхтэй холбоотойгоор ой хээрийн түймэр гарах тохиолдол ихэсдэг. Нийт түймрийн 90 гаруй хувь нь хүний анхаарал болгоомжгүй байдлаас үүдэн гардаг гэдгийг албаныхан онцолж буй.
