Эхлээд КОВИД-ыг хохирол багатай даван туулахад анхаарлаа хандуулна уу, эрх баригчид аа

2021-04-21 Нийтлэл

 

 

Монгол хэмээх хоёр их гүрний дунд орших “бяцхан” улсад өнөөдөр амь тулсан чухал асуудал бол КОВИД-ыг хохирол багатай даван туулах. Бид цэнхэр гаригт хэдүүлээ билээ… Түүнээс эрх мэдлийн их тулаанд эрх баригчид нь хүчээ барж, төрт улсаа донсолгох нь цаг үеэ олсон оновчтой шийдэл бус юм. Гэвч сүүлийн өдрүүдэд улс төрийн гол хүчнүүд дотоодод бүртгэгдэх халдварын тоотой уралдаж, ёс бусаар өөрсдийн эрх ашгийн төлөө улаа амлан хоорондоо эвдрэлцэж суух. Үнэндээ Ерөнхий сайд асан У.Хүрэлсүх, Ерөнхийлөгч Х.Баттулга хоёр аль аль нь яг өнгө ижлээр буюу Үндсэн хуулийн бус замаар засаглаж, эрх мэдэлд хүрэх, албан тушаалаа хадгалах оролдлого хийж байна. Түүгээр ч зогсохгүй улс төрийн жижиг намуудыг эгнээндээ нэгтгэж, цахим орчинд иргэдийн санаа бодлыг эл зүгт чиглүүлэх ажлыг ч троллуудаараа эхлүүлэв. Харин энэ зуур буюу Ерөнхийлөгчийн сонгуультай холбоотой Цэцийн шийдвэрийн дараа АН хамгийн их хөл хөдөлгөөнд орж, энд тэнд сэм цуглаж буй талаарх мэдээлэл чих дэлсэх болов. Янз нь О.Цогтгэрэл, Х.Тэмүүжин, Лу.Гантөмөр нар, З.Энхболд, Р.Амаржаргал нар, Ц.Элбэгдорж, С.Эрдэнэ нарыг дагасан гурван “бүлэг” болж яриа хөөрөө болцгоож байгаа гэх. Улмаар “…Хоёр АН нэгдэх ёстой” гэсэн дүгнэлтэд хүрч, энэхүү ажиллагаагаа хэрэгжүүлэхээр ярьж эхэлсэн мэдээтэй. Зүй нь Ерөнхийлөгч Х.Баттулга дахин нэр дэвших эрхгүй болсон учраас дараагийн сонгуульд нэр дэвшихийг горилогчид ч хүсэл сонирхлоо илэрхийлж эхэлсэн сурагтай. Одоогоор АН-аас Ерөнхийлөгчид нэр дэвших магадлалтай Х.Тэмүүжин, З.Энхболд, Э.Бат-Үүл, С.Эрдэнэ, Я.Санжмятав, Р.Амаржаргал, Ц.Оюунгэрэл, Н.Алтанхуяг нарын найман хүний нэрийн жагсаалт гараад байна.

Ямартай ч Ерөнхийлөгч нь байна уу, АН МАН нь байна уу, эх орон элгэн садныхаа төлөө улс төрийн эрх ашгаа хойш нь тавьж, дэлхийг сөгдүүлсэн хар тахлыг хохирол багатай даван туулахад анхаарлаа хандуулна уу. Тэгээд ч улс төрийн аливаа намыг уур нь хүрхээрээ нэг албан тушаалтан тараах санаачилга гаргаад шүүхэд захирамжлаад байх нь хуулийн засаглал бүхий ардчилсан улсад зөвтгөмгүй үйлдэл юм. Дахин хэлэхэд, яахав ардчилсан улсад хоёр улстөрч өрсөлдөх, маргалдах, улс төрийн оноо авах, алдах асуудал бол энгийн зүйл. Харин түүнд нь автаж, жомоо алах гэж байгаад гэрээ шатаав гэдэг шиг хувьсгал мөргөлдөөн хийх тухай ярих, уриалах бол утгагүй асуудал. Өнөөдөртөө монголын хоолойд тулсан асуудал бол ковид. Аль аль талын дэмжигчид нь өнөөдрийн хөрсөндөө бууж, бодит байдалд ухамсартай хандахыг хүсэж байна.

О.ГЭРЭЛ

<

© 2021 newsmedia.mn. Бүх эрх хуулиар хамгаалагдсан.