Д.Нарангэрэл: Өнөөдрийн байдлаар 3 112 хүн коронавирусийн эсрэг дархлаажуулалтад хамрагдлаа

Өнөөдрийн байдлаар зорилтот бүлгийн 22 хувьд буюу 3112 хүн коронавирусийн эсрэг дархлаажуулалтад хамрагдаад байна. Энэ талаар ЭМЯ-ны ахлах шинжээч Д.Нарангэрэл өнөөдрийн хэвлэлийн хурлын үеэр мэдээлэв.

Тэрбээр “Дэлхий дахинд коронавирусийн эсрэг дархлаажуулалтын ажил эхлээд хоёр сар болж байна. Манай улсад гурав дахь өдрөө үргэлжилж байна. Бид коронавирусийн эсрэг “АстраЗенека” вакцинаар эхний удаад зорилтот бүлгийн 16 байгууллагын 14 092 хүнийг хамруулахаар төлөвлөсөн” гэв.

Монгол Улсын Дархлаажуулалтын хуулийн дагуу манай улсад товлолын, нөхөн, нэмэлт, сайн дурын, тархвар судлалын заалт бүхий гэхчлэн таван төрлийн дархлаажуулалт хийдэг байна. Хамгийн түрүүнд зорилтот бүлэг буюу эрүүл мэндийн байгууллагын ажилтан, халдварын голомтод ажиллаж байгаа онцгой байдал, цагдаа, мэргэжлийн хяналт, хил хамгаалах байгууллагын ажилтан, 50 ба түүнээс дээш насны хүмүүс, архаг хууч өвчтэй, хөгжлийн бэрхшээлтэй иргэдийг дархлаажуулж буй юм.

Вакцин хийлгэсний дараа халуурах, булчин, толгой өвдөх, чичрүүдэс хүрэх, даарах, бүх бие, үе мөч өвдөх, ядрах, хамар битүүрэх, хэсэг газарт улайх, хавдах зэрэг шинж тэмдэг илэрнэ.

Энэ нь вакцин хийлгэснээс хойш 2-3 хоногийн дараа аяндаа алга болдог. Хэрвээ дээрх шинж тэмдгүүд илүү мэдрэгдэж эхэлбэл иргэд 119 болон вакцин хийлгэсэн харьяа эрүүл мэндийн төвийн эмчид хандаж зөвлөгөө авах боломжтой аж.

Вакцины эхний үр дүнг ДЭМБ дэлхийд “COVID-19” тохиолдлын тоо сүүлийн 6 долоо хоног дараалан буурч байгааг мэдээлжээ. Өөрөөр хэлбэл, энэ сарын 21-ний долоо хоногт тохиолдлын тоо 11 хувиар буурсан байна. Нас баралт өмнөх долоо хоногийнхоос 20 хувиар буурчээ.