А.АМБАСЭЛМАА: 49 хүнээс Covid-19 халдвар илэрсний 10 нь масс дундаас батлагдсан

Засгийн газраас Сovid-19 халдварын талаарх өнөөдрийн /2021.02.18/ ээлжит мэдээллээ хийлээ.

ХӨСҮТ-ийн Тандалт судалгааны албаны дарга А.АМБАСЭЛМАА “Өчигдөр нийт 40217 хүнд шинжилгээ хийхэд нийслэлд 49 хүнээс Covid-19 халдвар илэрлээ. Давтан шинжилгээнүүд болон ойрын хавьтлуудаас халдвар илэрлээ. “Нэг хаалга –Нэг шинжилгээ” арга хэмжээний хүрээнд 10 хүнээс халдвар илэрсэн. Одоогоор тус өргөтгөсөн шинжилгээний хүрээнд 37 хүнээс халдвар илрээд байна. Анхны 19 хүнээс шинжилгээ авч тэдний хавьтлыг тусгаарлан шинжилгээ авах явцад нэмэгдэж 18 хүнээс халдвар илэрсэн. Эдгээр иргэдийн байршлуудаас дурьдвал, БГД-ийн 3,12,25, БЗД-ийн 26, СБД-ийн 18, СХД-ийн 6,7,18,31,39 ХУД-ийн 2,4 ЧД-ийн 2,6,12-р хороо байна.

Ийнхүү Улаанбаатар хотод халдварын батлагдсан тохиолдол 1654 болсон. Улсын хэмжээнд кластер өвчлөлийн голомтод 1980 тохиолдол батлагдсан. Өчигдөр 25 хүн эдгэрч гэртээ харьсан. Монгол Улсын хэмжээнд Covid-19 халдварын батлагдсан нийт тохиолдол 2493. Үүнээс 1802 хүн эдгэрлээ. Одоогийн байдлаар ХӨСҮТ болон Цэргийн төв эмнэлэгт 678 хүн эмчлэгдэж байна.

Биеийн байдлыг үнэлбэл,

• Маш хүнд 1
• Хүнд 7
• Хүндэвтэр 86
• Хөнгөн 584 хүн байна” гэлээ.