ЭМЯ: МОСКВА-УЛААНБААТАРЫН нислэгээр зургаан хүнийг сэжигтэй ТОХИОЛДОЛ хэмээн ТУСГААРЛАЛАА

 

Эрүүл мэндийн яамнаас шинэ коронавирусийн нөхцөл байдлын талаарх мэдээллийг хүргэж байна. Сүүлийн 24 цагийн байдлаар өвчлөл өмнөх өдрөөс 14,000-аар буурсан таатай мэдээтэй байгаа юм.

ЭМЯ-ны хэлтсийн дарга Д.Нарангэрэл “Манай хойд хөршид сүүлийн хоногт 8,946 өвчлөл шинээр бүртгэгдсэн. Манай улсын олон аймагтай хил залгаа Эрхүү, Буриад, Тува, Читад өвчлөл 78-116 тохиолдлоор нэмэгдэж, эрчимтэй тархаж байна. Ялангуяа Эрхүү хотод сүүлийн гурван өдөр дараалан өвчлөл эрчимтэй нэмэгдлээ. Тиймээс Увс, Хөвсгөл, Дорнод зэрэг аймгийн иргэд амны хаалтаа зүүж, хүн хоорондын зайгаа барин олон нийтийн газар болон хил орчмын бүсээр явахгүй байхыг зөвлөж байна. Мөн амралтын газруудад зөвлөмж хүргүүлсэн. Амралтын газрууд амрагчдыг нэг өрөөнд бөөгнүүлэхгүй байх, нэг дор хүмүүсийг хоолны ширээнд бөөгнүүлэхгүй байх, ширээ хоорондын зайг 1.5 метрийн зай барих шаардлагатай. Хүн хүлээж авахын өмнө өрөөг сайтар цэвэрлэж халдваргүйжүүлэх ёстой” гэв.

Дашрамд дуулгахад, ЭМЯ-ны тусгай 119 дугаарт 336 иргэнээс дуудлага ирж, зөвлөгөө авсан байна. Харин шуурхай аппликейшнээр дамжуулан гадаад орнуудаас 31 иргэн холбогдож мэдээлэл, зөвлөгөө авчээ. Мөн  ЗӨСҮТ-ийн баг 180 хүний ачаа тээшид халдваргүйжүүлэлт хийжээ.