Одоогийн байдлаар 2.216 иргэн тусгаарлалтад байна

ЭМЯ-ны ээлжит мэдээллийн үеэр Эмнэлгийн тусламжийн газрын дарга Я.Буянжаргалын хэлснээр “Өнөөдрийг хүртэл нийт 3.633 хүнийг тусгаарлан ажиглалтад авчээ. Одоогийн байдлаар 2.216 иргэн тусгаарлалтад байгаа аж.  Мөн тэрбээр “Баян-Өлгий аймагт нэг жолооч нэмэгдсэн бол Дархан-Уул аймаг 34 иргэн, Баянбууралын амралтад 149 хүнийг нэмж тусгаарласан байна. 149 иргэн нь Алтанбулагийн боомтоор орж ирсэн бөгөөд тэднийг түргэний галт тэргээр Баянбууралын амралтад аваачсан.

Цаашид мөн бид УОК-ын шийдвэрээр иргэдийг нэмж тусгаарлах байруудыг бэлэн болгож байна. Хэрвээ Баянхангай, Баянбайгаль, Батсүмбэрийн амралтуудад иргэдийг тусгаарлахаар болбол тэнд ажиллах эмч, эмнэлгийн ажилтнуудыг бэлдсэн.

 УОК-ын хурлаар тусгаарлах хугацааг 21 болгож сунгасан бөгөөд ганц, ганцаар нь тусгаарлах нөхцөлийг бүрдүүлэхээр шийдвэрлэсэн.

Мөн тусгай үүргийн онгоцоор ирэх иргэдэд хатуу шаардлага тавих юм байна.

• Иргэдийг тухайн улс орондоо коронавирусийн шинжилгээнд хамруулж, сөрөг тохиолдолд онгоцонд суулгах
• Ямар нэгэн халдварын шинж тэмдэг илэрсэн иргэнийг онгоцонд суулгахгүй
  Бүх хүн амны хаалт, бээлийтэй байх
• Онгоцонд сууснаас хойш зорчигчид аль болох хоорондоо ярихгүй байхыг сануулах
• Онгоцоор ирэх иргэдий халууныг хоёр цаг тутамд шалгах
• Сэжигтэй тохиолдол гарвал онгоцны арын суудал руу тусгаарлах

Бид тусгай үүргийн онгоцонд явах эмч, эмнэлгийн мэргэжилтнүүд болон түргэвчилсэн оношлуурын бэлэн байдлыг ханган ажиллаж байна.