Шууд-ЭМЯ: Манай улсад өчигдөр гурван хүнд халдвар илэрсэн

КОРОНАВИРУСТ ХАЛДВАР (COVID-19)-ын нөхцөл байдлын хэвлэлийн бага хурал эхэллээ.

Дэлхий дахинд сүүлийн 24 цагийн хугацаанд 14 улсад шинээр халдвар бүртгэгдэж, нийт 164 улсад халдвар гараад байна. Мэдээллийн эхэнд ЭМЯ-ны хэлтсийн дарга Д.Нарангэрэл “Манай улсад өчигдөр гурван хүнд халдвар илэрсэн. Гурван иргэний хоёр нь Сөүл-Улаанбаатарын онгоцоор ирсэн бол нэг нь Берлиний тусгай нислэгээр ирсэн бөгөөд эхний ээлжинд гурван хүнээ ХӨСҮТ-д тусгаарлаад байна. Ойрын бүх хавьтлыг шинжилгээнд хамруулна.

Бид халдвар гарсан улсаас иргэдээ авчирч байгаа учраас эрсдлээ тооцоод бүх зорчигчдыг онгоцонд амны хаалттай байлгаж байсан. БНСУ-аас ирсэн халдвартай хоёр хүний хувьд тэнд байх хугацаандаа эмнэлгээр үйлчлүүлсэн байна. Тиймээс иргэддээ аль болох эмнэлэгт очихгүй эхний ээлжинд утсаар зөвлөгөө авч байхыг ахин дахин сануулъя.

Гурав, дөрөвдүгээр сард монгол хүний дархлаа хамгийн ихээр унадаг учраас эрүүл мэндийн байгууллагаас өгч байгаа зөвлөмжийг чанд сахихыг хүсэж байна” гэлээ.

Мөн ХӨСҮТ-ийн захирал Д.Нямхүү “Энэ сарын 11-нд батлагдсан Франц иргэний ойрын хавьтлын 88 хүний давтан шинжилгээ сөрөг гарлаа. Энэ сарын 15-нд ХӨСҮТ тусгаарлаглсан нэг, Баян-Өлгийд тусгаарлагдсан нэг хүний шинжилгээ сөрөг гарсан. Өчигдөр ХӨСҮТ-д нэг сэжигтэй тохиолдол ирсэн. Үүнд хяналт шалгалт хийгдэж байна. Батлагдсан гурван тохиолдолтой холбогдуулан онгоцоор хамт ирсэн иргэдийг тусгаарлан ажиглалтад авч байна.

Нэмж хэлэхэд 15 минутын хугацаанд хариу нь гардаг шинэ коронавирусийн түргэвчилсэн оношлуур бидэнд бий. Түүгээр бид онгоцоор ирсэн 43 хүнд шинжилгээ хийж үзэхэд бүгдэд нь коронавирус илрээгүй. Эхний мэдээ болгож авах түргэвчилсэн оношлуур байгаа нь бидний ажлыг жоохон ч гэсэн хөнгөлж байна. Мөн халдвартай манай улсын гурван иргэн 37, 50 болон 60 гаруй насны эмэгтэйчүүд байгаа. Харин манай улсад эмчлэгдэж байгаа Франц иргэний биеийн болон сэтгэл санааны байдал сайн байгаа” гэдгийг онцоллоо.

ДЭМБ-ийн мэдээллээр өнгөрсөн 24 цагийн хугацаанд БНХАУ-д байгаа халдварын тооноос бусад улсад гарч байгаа халдварын тоо давсан үзүүлэлттэй гарчээ.

Удаах мэдээллийг Гадаад харилцаа, хамтын ажиллагааны газрын дарга Б.Янжмаа “Европын холбооны улсуудад халдварын тархалт өндөр байгаатай холбогдуулан Франц улс хилээ бүрэн хааж, гэрээсээ гарахгүй байхыг анхааруулсан. Хэрэв горим зөрчвөл торгох арга хэмжээ авах талаар хатуу санууллаа. Тус улсад халдварын 6600 тохиодол бүртгэгдээд байна. АНУ-д халдварыг хязгаарлах зорилгоор иргэдийг гэрээсээ аль болох гарахгүй байх, боломжтой бол гэрээсээ гарахгүй байх, гадуур хооллохоос татгалзах, 10-аас дээш тооны хүнтэй уулзахгүй байх зэрэг арга хэмээ авч байна. ОХУ-ын хувьд тус улсад харьяалалгүй хүмүүсийг хилээр нэвтрүүлэхгүй байх шийдвэр гаргасан.” хэмээн тодрууллаа.