Хэлэлцүүлэгт, Эрүүл мэндийн сайд А.Цогцэцэг, Монгол Улсын Ерөнхийлөгчийн Эрүүл мэндийн асуудал хариуцсан орон тооны бус зөвлөх, Анагаах ухааны доктор Ж.Амарсанаа болон ЭМЯ, ХХААХҮЯ, МХЕГ, ЦЕГ, Монголын хуульчдын холбоо, Дэлхийн эрүүл мэндийн байгууллагын мэргэжилтнүүд, Нийгмийн эрүүл мэндийн үндэсний төв, иргэдийн төлөөлөл оролцож байна.

Хэлэлцүүлгийг нээж Монгол Улсын Ерөнхийлөгчийн Тамгын газрын дарга З.Энхболд:

“Эрхэм хүндэт эрдэмтэд, эрүүл мэндийн салбарт ажиллаж буй төрийн болон төрийн бус байгууллагын албан хаагчид Та бүхний энэ өдрийн амгаланг айлтгая.

Монгол Улсын Ерөнхийлөгч Х.Баттулга 2017-2021 онд хэрэгжүүлэх Бодлого, үйл ажиллагааны хөтөлбөртөө “Монгол хүний эрүүл мэнд, бие бялдрын хөгжлийг Монгол төрийн бодлогын үндсэн цөмд байлгах зарчим баримтална. Иргэдийн эрүүл аюулгүй орчинд амьдрах Үндсэн хуулиар олгогдсон эрхийг баталгаажуулж, монгол хүний эрүүл мэндийг сахин хамгаалах, эрүүл чийрэг бие бялдартай болгон хөгжүүлэх бодлогод онцгой анхаарч ажиллана” хэмээн заасан.

Энэ хүрээнд 2017 онд шүдний эмч, мэргэжилтнүүдийн уулзалт зөвлөгөөн болон тус бүр 4 удаагийн цуврал хэлэлцүүлэг хийсний үндсэн дээр 9 дүгээр сард “Хүнсний аюулгүй байдлын үндэсний чуулган, 10 дугаар сард “Агаарын бохирдлын эсрэг үндэсний чуулган”-ыг зохион байгуулж, агаарын бохирдолтой “онц байдал” зарлан тэмцэх санаачилга гаргаж ажилласан.

Мөн ард иргэдийнхээ санал бодлыг сонсох, бодлого, үйл ажиллагаандаа тусгаж ажиллах зорилгоор нийслэлийн болон орон нутгийн иргэдтэй уулзахад эрүүл мэндтэй холбоотой иргэдийн санал хүсэлт олныг сонсож хүлээж авсан юм.

Иргэдээ анхааран сонсож, эрүүл мэндийн салбарт тулгамдаж буй асуудлыг шийдвэрлэх, Монгол Улсын Ерөнхийлөгчийн бодлого, үйл ажиллагааны хөтөлбөрийг хэрэгжүүлэх үүднээс Ерөнхийлөгчийн Тамгын газар өнөө жил эрүүл мэндтэй холбоотой олон ажил төлөвлөсний нэг нь өнөөдрийн энэ “Эрүүл мэндийн салбарын хууль эрх зүйн орчин, иргэний эрүүл мэндийн эрхийн тухай” сэдэвт хэлэлцүүлэг болж байна.

Өнөөдөр Монгол Улс маань зарим өвчлөл, нас баралтаар дэлхийд тэргүүлж байгаа нь сэтгэл түгшээж, санаа зовоож байна. Төрийн түвшинд бодлого алдагдсан нэг жижиг асуудал ард иргэдийн амьдралд олон зуун том асуудал болж очдог. Ялангуяа төрөөс иргэдийн эрүүл мэнд, амь настай холбоотой асуудлыг онцгой анхаарч, цаг алдалгүй шуурхай засаж залруулж байх ёстой. Хэлэлцүүлгээр салбарын шинэчлэлийн хууль эрхзүйн орчны гаргалгаа, тулгамдсан олон асуудлын шийдлийг тодорхойлж, санал бодлоо цэгцлэн, нэгдсэн нэг ойлголтод хүрснээр цаашид асуудлыг шийдвэрлэхэд хамтран ажиллана гэж найдаж байна” гэсэн юм.

Мөн Монгол Улсын Ерөнхийлөгчийн Эрүүл мэндийн асуудал хариуцсан орон тооны бус зөвлөх, Анагаах ухааны доктор Ж.Амарсанаа:

“Монголын эрүүл мэндийн салбар хөгжлөөрөө 200 гаруй улсаас 145-д жагсаж байна. Энэ нь мэдээж цаашид эрүүл мэндийн салбарт сайжруулах, засаж залруулах олон асуудал байгааг илтгэж байна. Эрүүл мэндийн салбарын бас нэг чухал үзүүлэлт нь тухайн улсын иргэдийн дундаж наслалт байдаг. Монгол Улсад дундаж наслалт 69 болсон. Гэтэл хөрш зэргэлдээ улс орнуудын дундаж наслалт 85-86 болж нэмэгдсээр байгаа. Ингэж урт насалж байгаа нь тухайн улсын эрүүл мэндийн салбарын тогтолцоо нь сайн, салбар нь тогтвортой байна гэсэн үг.

Мөн бид энэ удаагийн хэлэлцүүлгийн үеэр ихэвчлэн салбарын хууль эрхзүйн орчинг сайжруулах болоод уялдаа холбоог нь хангах талаас нь асуудлыг хөндөнө. Төрийн болоод төрийн бус олон байгууллага яг энэ сэдвээр судалгаа хийж, илтгэл хэлэлцүүлэхээр бэлтгэсэн. Мөн иргэдийн оролцоог хангаж байгаа нь иргэд өөрсдөө эрүүл мэндийн тусламж үйлчилгээ авч, эрүүл аюулгүй орчинд амьдрах эрхээ эдэлж чадаж байна уу, тулгамдаж байгаа асуудал нь юу вэ гэдгийг хэлэлцүүлэхэд анхаарч байгаа юм. Ямартай ч нэгдсэн хэлэлцүүлгийн дараагаар санал, дүгнэлт гарч эрх зүйн баримт бичиг болох ёстой. Эрүүл мэндийн сайд А.Цогцэцэг өөрөө хэлэлцүүлэгт оролцож байгаа учраас хэлэлцүүлгээс гарч байгаа санал, дүгнэлтийг хүлээж авна гэдэгт бид итгэлтэй байгаа” гэв.

Эх сурвалж: PRESIDENT.MN