УИХ дахь МАН-ын бүлэг хуралдахаар төлөвлөж, АН-ын бүлэг чуулганы танхимд лоозон хатгасан байдалтай байна

Хаврын чуулганы нэгдсэн хуралдаан нээлтээ хийсэн цагаасаа хойш ийнхүү хоёр дахь долоо хоног хүртлээ гишүүдийн ирц хүрээгүйн улмаас хойшилсоор байна.

УИХ дахь МАН-ын бүлэг 68 гишүүнтэй бол Ардчилсан намын бүлэг 42 гишүүнтэй.

Одоогийн байдлаар Ардчилсан намын бүлгийн тухайд, өнгөрсөн долоо хоногоос эхлүүлсэн акциа үргэлжлүүлэн УИХ-ын дарга Н.Учралыг чөлөөлөгдтөл чуулганы нэгдсэн хуралдаанд оролцохгүй гэдэг шаардлага тавин, чуулганы танхимд өөрсдийн байр суурийг илэрхийлсэн лоозонг байршуулаад байна.

Үүсээд буй нөхцөл байдалтай холбогдуулан УИХ-ын гишүүн, АН-ын дарга О.Цогтгэрэл “УИХ-ын чуулган хоёр дахь долоо хоногтоо хуралдсангүй. МАН-д манай намгүйгээр ирцээ бүрдүүлээд хуралдах бүрэн дүүрэн боломж байгаа. Хурлыг явуулахгүй байгаа нь бид биш, тэд.

Харин МАН-ын бүлгийн дарга Ж.Батжаргал “Өнөөдөр 14.00 цагаас МАН-ын бүлэг ээлжит бусаар хуралдаж үүсээд буй асуудал дээр улс төрийн шийдвэр гаргана. МАН-ын бүлгийн хувьд, өнөөдөр ээлжит бусаар хуралдаж улс төрийн шийдвэр гаргахаар боллоо” хэмээн мэдэгдсэн.

Ямартай ч УИХ 126 гишүүнтэй бөгөөд 68-аас дээш гишүүн чуулганы нэгдсэн хуралдаанд оролцож байж ирц 50 хувийн босго давах ёстой юм. Гэвч хаврын чуулганыг гуравдугаар сарын 16-нд нээснээс хойш чуулганы нэгдсэн хуралдааныг дахин хуралдуулж чадахгүй өнөөдөр хоёр дахь долоо хоногтойгоо золгосон нь энэ.

УИХ-ын чуулганы нэгдсэн хуралдаанаар сайд нарыг томилох, чөлөөлөх асуудлыг танилцуулах, Монгол Улсын Ерөнхийлөгчийн санаачилсан УИХ-ын гишүүнийг эгүүлэн татах тухай асуудалтай холбоотой төслийг хэлэлцэхээр төлөвлөсөн байгаа юм.