Б.Ганхуягийн хэрэг эцэслэн шийдвэрлэгдээгүй тул нүүрсний сонсголд оролцуулах боломжгүйг шүүхээс мэдэгджээ

“Нүүрсний хулгай”-н асуудлаарх Нотлох баримтыг шинжлэн судлах хоёр дахь удаагийн сонсгол өнөөдөр үргэлжилж байна. Өнөөдрийн сонсголд “Эрдэнэс Тавантолгой” ХК-ийн гүйцэтгэх захирал асан Б.Ганхуяг гэрчээр дуудагдаад байсан юм.

Хянан шалгах түр хорооноос арванхоёрдугаар сарын 13-ний өдөр түүний өмгөөлөгч н.Нямдоржид мэдэгдэх хуудсыг хүргүүлсэн. Мөн энэ сарын 12-ны өдөр шүүгдэгч Б.Ганхуягийг гэрчээр оролцуулах тухай албан бичгийг Чингэлтэй дүүргийн эрүүгийн хэргийн анхан шатны шүүхийн ерөнхий шүүгч н.Халиунд явуулсан байна.

Харин ерөнхий шүүгчээс арванхоёрдугаар сарын 13-ны өдөр шүүхийн хэргийг эцэслэн шийдвэрлээгүй шүүгдэгч нарын гэмт буруутай эсэхийг тогтоогоогүй бөгөөд хэрэг шүүгдэх, хянан шийдвэрлэх ажиллагаанд байгаа тухай хариу албан бичгийг ирүүлснийг өнөөдрийн сонсголын ирцийн мэдээн дээр танилцууллаа.

Тэрбээр өөрөө нүүрсний сонсгол оролцох хүсэлтээ илэрхийлсэн ч шүүх хурал нь энэ сарын 27-ны өдөр хүртэл хойшлогдоод байгаа юм.