Сонгууль: Ирэх парламентын өнгө

Монгол Улс төр засгаа төвхнүүлэх УИХ-ын найм дахь удаагийн сонгуулиа амжилттай зохион байгуулж, сонгогчдын ирц  хамгийн өндөр буюу нийт сонгогчдын 73.64 хувь нь саналаа өглөө. Энэ удаагийн сонгуульд иргэд үнэхээр ач холбогдолтой хандсан нь ийнхүү ирцийн үзүүлэлтээс харагдаж байна. Нэг үгээр хэлбэл, хэдийгээр цаг агаарын хувьд хур бороотой, зарим газар үерт авсан, коронавирусийн халдварын хорио цээрийн дэглэмтэй цаг үед зохион байгуулагдсан сонгогчид идэвхтэй байлаа. 

Энэ удаадгийн УИХ-ын сонгуулийн дүнгээр МАН 62 суудал авч үнэмлэхүй олонх боллоо. Харин АН 11, “Та бидний эвсэл” нэг, “Зөв хүн Электорат” эвсэл нэг суудал авлаа. Бие даагчдаас Орхон аймагт нэр дэвшсэн Н.Алтанхуяг сонгогдов. 

Хамгийн өндөр санал авсан таван нэр дэвшигч

Мөн УИХ-ын гишүүн Н.Учрал нийт нэр дэвшигчдээс хамгийн өндөр саналыг аваад байна. Тэрбээр УИХ-ын сонгуулийн 28 дугаар тойрог буюу Сонгинохайрхан дүүрэгт нэр дэвшсэн бөгөөд 53.651 санал буюу сонгогчдын 65.5 хувийн итгэлийг хүлээж, ирэх парламентад улиран сонгогдлоо.

Урьдчилсан дүнгээр ирэх парламентад 13 гишүүн төр түшилцэхээр сонгогдоод байна. Тэднээс хамгийн өндөр санал авсан нь Эрүүл мэндийн сайд Д.Сарангэрэл. Тэрбээр УИХ-ын сонгуулийн 29 дүгээр тойрогт нэр дэвшиж 37.457 санал буюу Хан-Уул дүүргийн саналаа өгсөн сонгогчдын 42.1 хувийн итгэлийг өвөртлөөд байна.

Мөн түүнтэй хамт нэг тойрогт МАН-аас нэр дэвшсэн Г.Амартүвшин 37.476 санал буюу сонгогчдын 42.1 хувийн саналыг авч ялалт байгуулжээ.

Түүнчлэн Хасуурын Ганхуяг хэмээн танигдсан эрхэм ирэх парламентад шинээр сонгогдоод байна. Тэрбээр УИХ-ын 26 дугаар тойрогт нэр дэвшиж 50.073 санал буюу 48.2 хувийн санал авчээ.

Хорих 461-р ангиас нэр дэвшигч ялалт байгуулав

Энэ удаагийн сонгуульд хорих ангиас зургаан нэр дэвшигч өрсөлдсөн нь онцлох үйл явдал байлаа. Өмнөх сонгуулиудын түүхэнд ийм зүйл байсангүй. Тэгэхдээ бүр хорих 461-р ангид хоригдож буй нэр дэвшигч тойрогтоо хамгийн өндөр санал авлаа.

Тодруулбал, Сэлэнгэ аймгийн 13-р тойрог 3 мандаттай бөгөөд нэр дэвшигч Ж.Эрдэнэбат ялалт байгуулж, Сэлэнгэчүүдийн итгэлийг дахин хүлээв.

Ж.Эрдэнэбатаас гадна УИХ-ын сонгуулийн 29 дүгээр тойрог буюу Хан-Уул дүүрэгт бие даан нэр дэвшигч Н.Номтойбаяр, Ардчилсан намаас Сэлэнгэ аймагт нэр дэвшигч С.Баярцогт, Хөвсгөл аймагт нэр дэвшигч Д.Ганболд, Дархан-Уул аймагт нэр дэвшигч Б.Бямбасайхан, УИХ-ын сонгуулийн 28 дугаар тойрог буюу Сонгинохайрхан дүүрэгт “Сахигтун! Үндсэн хуулийн 19 эвсэл”-ээс нэр дэвшигч Х.Бат-Ялалт нар хорих 461-р ангиас сонгуульд оролцов.

Шинээр бүрдэх парламентад хоёр Бат-Эрдэнэ, хоёр Энх-Амгалан, хоёр Мөнхцэцэг сонгогдлоо. УИХ-ын гишүүн Ж.Бат-Эрдэнэ, Б.Бат-Эрдэнэ нар хуучин тойргоосоо дахин сонгогдов. Мөн УИХ-ын дэд дарга Л.Энх-Амгалан Хөвсөл аймгаасаа дахин сонгогдсон бол Зам, тээврийн хөгжлийн сайд Б.Энх-Амгалан тойргоо сольж, Говь-Алтай аймгаас сонгогдсон юм. Түүнчлэн УИХ-ын гишүүн Г.Мөнхцэцэг Дундговь, Говьсүмбэр аймгаас дахин сонгогдож, улс төр судлаач Ц.Мөнхцэцэг парламентад анх удаа нэр дэвшиж, Сүхбаатар дүүргээс сонгогдлоо.

Цор ганц бие даагч ялалт байгуулав

Энэ удаагийн сонгуульд 121 бие даагч нэр дэвшсэн ч цор ганц нь ялалт байгуулж, УИХ-ын гишүүнээр сонгогдоод буй. Тэр бол Норовын Алтанхуяг.

Тэрбээр УИХ-ын сонгуулийн 20 дугаар тойрог буюу Орхон аймагт нэр дэвшсэн бөгөөд нийт сонгогчийн 42.9 хувийн саналыг авсан байна. Түүний дараа Дархан-Уул аймаг буюу УИХ-ын 19 дүгээр тойрогт бие даан нэр дэвшсэн Тордойн Ганболд сонгогчдын 33.8 хувийн саналтайгаар бичигдсэн ч УИХ-д суух босгыг давж чадаагүй юм.

Энэ удаагийн парламентад 13 эмэгтэй гишүүн сонгогдоод байна

Тодруулбал, МАН-аас нэр дэвшсэн Д.Сарангэрэл, Х.Булгантуяа, Б.Баярсайхан, Ц.Мөнхцэцэг, Г.Мөнхцэцэг, Ч.Ундрам,  Д.Өнөрболор, Б.Саранчимэг, М.Оюунчимэг, Б.Жаргалмаа, П.Анужин нар болон АН-аас С.Одонтуяа, А.Адьяасүрэн нар сонгогдсон нь тодорхой болоод байна. Өөрөөр хэлбэл, парламентын гишүүдийн 17%-ийг эмэгтэй гишүүд эзлэх урьдчилсан дүн гараад байна.

Дашрамд дуулгахад, Зөв хүн электоратаас Т.Доржханд, Та бидний эвслээс мөн Орхон аймагт С.Ганбаатар нар УИХ-д сонгогдоод байгаа юм.

Долоон засаг дарга УИХ-ын гишүүнээр сонгогджээ

 

УИХ-ын ээлжит сонгуулиар Нийслэлийн засаг дарга, Багануур дүүргийн засаг дарга болон Дорноговь, Өвөрхангай, Орхон, Төв, Өмнөговь аймгийн засаг дарга нар тойрогтоо ялалт байгуулж, УИХ-ын гишүүнээр сонгогдлоо. 

Тухайлбал:

• Нийслэлийн засаг дарга С.Амарсайхан
• Багануур дүүргийн засаг дарга Ц.Сандар-Очир
• Орхон аймгийн засаг дарга Д.Батлут
• Төв аймгийн засаг дарга Ж.Батжаргал
• Өмнөговь аймгийн засаг дарга Н.Наранбаатар
• Өвөрхангай аймгийн засаг дарга Г.Ганболд 
• Дорноговь аймгийн засаг дарга Т.Энхтүвшин тус тус ялалт байгуулжээ. Энэ удаагийн сонгуулиар нийтдээ 33 нэр дэвшигч шинээр сонгогдож байна. Тэдний дунд долоон засаг дарга УИХ-ын гишүүн болж байна.